Antón García va ser el director xeneral de Política Llingüística y Martín López Vega de Cultura y Patrimoniu

UVIÉU, 4 Sep. (EUROPA PRESS) -

L'escritor y editor Antón García va ser l'encargáu de la Política Llingüística del Gobiernu asturianu. Per otru llau, l'hasta agora director de Cultura del Institutu Cervantes, Martín López Vega, va ser el responsable de Cultura y Patrimoniu.

El Conseyu de Gobiernu d'esti miércoles decidió'l nomamientu de 36 de los 44 directores xenerales, que xunto los titulares de los trés viceconseyeríes, dos xerencies, dos institutos y una axencia, xuben a 44 les designaciones. La portavoz del Executivu, Melania Álvarez destacó que los nomamientos sumen "renovación" xunto la "esperiencia nel so campu de xestión", amás de poner en valor de que más de la metá de los nomamientos --23-- son muyeres.

Na rueda de prensa posterior al Conseyu, la portavoz del Gobiernu y conseyera de Derechos Sociales y Bienestar destacó la renovación que se produció na estructura de l'Alministración autonómica "desque fai cuasi una década nun s'anovara" pa facer apueste polos exes del Executivu de Barbón, onde mentó'l retu demográficu, el turismu y la cultura --incluyida la promoción del asturianu--, l'impulsu a la innovación y l'apueste pola igualdá.

Nesi sentíu, l'escritor Antón García va ser el responsable de la Política Llingüística, una de les polítiques a les que'l presidente Adrián Barbón comprometióse a dar un impulsu decidíu. García yá foi coordinador de la promoción del asturianu nel Executivu autonómicu nos años ochenta --del so maxín salieron campañes como 'Dí-ylo n'asturiano' o la de la cartelería nesti idioma que tovía ta presente na mayoría de chigres del país, amás de les ayudes a la edición del llibru n'asturianu--.

García ye ún de los más prestixosos escritores del Surdimientu. Forma parte de la Segunda Xeneración xunto a Berta Piñán, que va ser la so xefa na Conseyería de Cultura. Antón García ye autor de noveles, traducciones y poesía. Ente elles se pue destacar 'Díes de muncho', pa munchos la novela más importante de la lliteratura asturiana.

Profesor de Lliteratura asturiana y española na Universidá d'Uviéu, en 1992 fundó Ediciones Trabe y foi xerente de delles empreses dedicaes al sector del llibru y la producción audiovisual. Miembru del Seminariu de Filoxía Asturiana de la Universidá d'Uviéu, amás d'historiador y críticu de la nuestra lliteratura, dirixe la revista 'Campo de los Patos'.

Per otru llau, l'escritor y traductor Martín López Vega va ser el director xeneral de Cultura y patrimoniu. Reconocíu pola so obra poética, tien publicáu narrativa, ensayu y dellos artículos en revistes especializaes. Vega tien una importante llabor como xestor cultural nel mundu editorial y trabaya dende 2017 nel Insistutu Cervantes, onde foi director de cultura. Esi mesmu añu, participó na Xunta d'Escritores Asturianos, celebrada en Villaviciosa.

P'acabar los nomamientos na Conseyería de Berta Piñán, la futbolista y creadora de la primer escuela de fútbol femenín d'Asturies, Beatriz Álvarez Mesa, va ser la responsable de Deportes. Defensora de la igualdá nel mundu del deporte y vinculada al Uviéu Modernu, va tener ente les sos funciones la promoción del deporte tradicional.

Coles mesmes, n'Educación, Miguel Ángel Barón va ser el responsable de Personal Docente, y Ana Isabel López Isla --natural d'El Franco y ex directora del Colexu Públicu El Cotayo de Carbayín Alto-- de Planificación y Infraestructures Educatives. Los dos trabayaron hasta'l momentu nel Serviciu d'Inspección Educativa asturianu.