UVIÉU, 17 Dic. (EUROPA PRESS) -
El coordinador xeneral de IX, Ramón Argüelles, refirióse esti llunes a la situación del portavoz parllamentariu na Xunta Xeneral del Principáu d'Asturies, Gaspar Llamazares, depués de que'l coordinador federal d'IX, Alberto Garzón, anunciara que la coalición va estudiar midíes contra él por transfuguismu.
Sobre la posible espulsión de Llamazares, Argüelles dixo que desconocía la situación esacta. "IX ye un partíu democráticu, que tien les sos garantíes, los sos órganos y los sos procedimientos y supongo que tanto Alberto Garzón, que se supón qu'entama esto, como Gaspar Llamazares, que foi un pocu'l debate, van poder utilizar les ferramientes democrátiques que tengan que tener pa iguar esti asuntu", apuntó al traviés d'unes declaraciones distribuyíes por IX.
Argüelles aseló sobre l'escenariu abiertu depués de la irrupción d'Actúa, el partíu impulsáu por Llamazares y l'ex xuez Baltasar Garzón, que se van presentar a les elecciones municipales, autonómiques y europees de 2019. "Les organizaciones puen dir lloñe, les persones somos prescindibles", alvirtió.
Sobre la situación n'Asturies, y la confección de les llistes de cara a les elecciones autonómiques, Ramon Argüelles aseguró que lo importante ye presentar una candidatura y comprometida colos valores d'IX y de la esquierda.
"Prestaríanos llevar una propuesta consensuada con una mayoría del 80%, pa que se vea qu'hai una base sólida", esplicó. "Yo nunca tuvi esi problema nin esi dilema, entá tando o nun tando Gaspar. Yo, como coordinador, voi poneme a disposición d'IX", añadió, falando de la necesidá d'una llista de xente "comprometida daveres".
