UVIÉU, 25 Abr. (EUROPA PRESS) -
El coordinador xeneral d'IX n'Asturies, Ramón Argüelles, fixo esti miércoles un llamáu a Podemos y PSOE pa "siguir trabayando" xuntos en proyectos llexislativos y midíes sociales pa lo que queda de llexislatura, pa qu'esta nun sía una "llexislatura perdida".
El dirixente d'IX esplicó qu'esti ye un "bon momentu" pa que pueda dase l'alcuerdu ente les trés fuercies, depués de llograr pactar el Creitu Estraordinariu qu'anguaño s'atopa en trámite parllamentariu. "Ye momentu d'espabilar", dixo nuna rueda de prensa celebrada na sede de la coalición.
Al Gobiernu autonómicu Argüelles reprochó-y que tea instaláu na "autocomplacencia", llamentando que nun ve "voluntá de facer iniciatives". Asina, criticó que l'Executivu socialista "nun va hacia alante" nin tramita proyectos na Xunta Xeneral.
"Supónse que ye'l Gobiernu'l que tien que llevar l'impulsu, y tamos faciendo propuestes dende la oposición", sorrayó. Esto débese, al so xuiciu, a la falta d'impulsu y "ganes de gobernar" del PSOE asturianu.
Nesti sentíu, señaló que'l Gobiernu tien que tener voluntá de sacar les coses "alantre" y buscar el consensu colos grupos parllamentarios, aprovechando la mayoría d'esquierdes de la Xunta Xeneral, na que POSE, Podemos y IX suman 28 diputaos. "Nun tamos equí pa bloquiar coses, porque del desencuentru de la esquierda nútrese la derecha", sorrayó.
El líder d'IX n'Asturies quier que la mayoría d'esquierdes nel parllamentu autonómicu trabaye en trés frentes no que queda de llexislatura.
El primeru d'ellos ye dexar de llau'l "hostigamientu" hacia los Conceyos asturianos, evidenciáu nel refugu a les alegaciones de los planes locales d'empléu, la baxa execución del plan 'Actívate', el salvamentu o llimpieza de sableres.
El segundu de los frentes nos qu'Argüelles quier aunir a la esquierda ye'l relativu a transición enerxética vinculada a la financiación autonómica. El coordinador d'IX abogó por que se contemple na financiación autonómica esta transición enerxética pa evitar una "descarbonización express", siendo consciente de qu'adulces va dexase d'utilizar el carbón pa llograr enerxía.
Sicasí, criticó, el PP "premia a otres comunidaes" como'l País Vascu pa llograr el so favor nos Presupuestos Xenerales del Estáu. "Asturies nun tien que ser menos que naide", defendió.
A lo último, criticó la falta d'actividá nel parllamentu autonómicu pa que s'aprueben iniciatives llexislatives. Asina, pidió un mayor impulsu pa sacar alantre la Llei propuesta pola coalición d'esquierdes relativa a los Derechos vitales básicos, la llei de memoria democrática y la de tresparencia y bon gobiernu.
Agora que la esquierda "púnxose d'alcuerdu" na llei de creitu, Argüelles señaló que cuenten con "fuercia abondo" pa sacar alantre lleis. Falta, al so xuiciu, que'l Gobiernu dexe de "ponese de perfil".
Sobre la relación entre Podemos y IX, Argüelles reconoció que, anque "hubo alcontrones" ente dambes fuercies, la puerta "sigue abierta" dende agostu de 2017 pa negociar lleis. Esplicó nesti sentíu qu'IX se "desesperanzó" cuando Podemos nun quixo apautar el presupuestu autonómicu, pero col respaldu del creitu considera que "dalgún golpe de timón dieron" en Podemos.
Preguntáu sobre la relación de la coalición cola directiva nueva de la Federación Socialista Asturiana, Argüelles esplicó que tienen una "bona" relación y reconoció que la dirección nueva de los socialistes asturianos ta nuna "situación delicada" por nun tar "na mesma onda" que'l Gobiernu.
