UVIÉU, 21 Feb. (EUROPA PRESS) -
La Conseyería d'Educación y Cultura entamó dellos actos con motivu del Día Internacional de la Llingua Materna, que la Unesco celebra'l 21 de febreru, y qu'anguaño se centra na preservación de les llingües indíxenes. Per otru llau, dellos conceyos van acoyer la presentación d'un xuegu pa preescolares.
Les actividaes van principiar esti miércoles, a les 11.30 hores, nel Teatru Toreno de Cangas, cola representación de 'Hansel y Gretel', pola compañía Higiénico Papel Teatro, ganadora del segundu festival Nel Amaro de teatru profesional n'asturianu y gallego-asturianu. La obra, entamada en collaboración col Conceyu, ye pal alumnáu de Primaria de los centros públicos del conceyu.
El xueves, a les 20.00 hores, va celebrase un actu nel Teatru Prendes de Candás, tamién en collaboración col Conceyu, que va zarrar les actividaes sobre'l Día de la Llingua Materna. Trátase de la representación de la obra 'Muyeres inesperaes', de la compañía Ververemos. L'autor ye'l dramaturgu Adolfo Camilo Díaz.
Amás, publicóse n'Educastur un manifiestu n'asturianu y en gallego-asturianu nel que se destaquen les ventayes d'una educación plurillingüe, pa que pueda lleese nos centros educativos nel recréu del 21 de febreru.
CONCEYOS
Per otru llau, dellos conceyos, como Colunga o Cangas, tán presentando estos díes una campaña de fomentu del asturianu nes escueles de 0 a 3 años. La campaña inclúi material específicu adaptáu a estos niveles que va ayudar a los neños y neñes a diferenciar los nomes de los distintos animales de la casería, y va ser completada por una programación de sesiones de cuentacuentos.
N'Avilés, la Estaya de la Llingua, xunto cola Conceyalía d'Educación, entama tres sesiones de bebecuentos musicales n'asturianu, p'alumnáu de 0 a 3 años nes tres Escueles d'Educación Infantil del Conceyu: La Madalena, La Toba y El Quirinal.
Amás, n'Uviéu, l'alcalde Wenceslao López va asistir al actu que se va celebrar nel Teatru Campoamor y que suma a los que se festexen en tol mundu pa reivindicar los derechos etnollingüísticos de los pueblos.
