UVIÉU, 2 May. (EUROPA PRESS) -
L'asociación Asturias Ganadera emitió esti miércoles una nota de prensa na qu'alerta de la "agresión constante" al patrimoniu arqueolóxicu asturianu nel occidente asturianu con distintes infraestructures, realizaes nos montes, especialmente la proliferación de parques eólicos. A pesar d'ello, falen de "inacción" del Gobiernu asturianu.
"Túmulos, dólmenes, poblaos prerromanos, antigües esplotaciones mineres romanes, son destruyíos énte la pasividá y inacción de les autoridaes competentes del gobiernu asturianu", alvirtieron.
Depués de recordar que la selmana pasada a un ganaderu de Rivadeva condenáronlu por filtraciones de de purinos qu'alteriaron les condiciones microbiolóxiques de la Cueva del Pindal, el portavoz d'Asturias Ganadera, Xuan Valladares, dixo que ye más fácil llevar per delantre a un "humilde ganaderu" qu'a una gran empresa.
"Pero lo que s'esixe d'un gobiernu decente ye que nun sía sumisu énte los poderosos y ponga frenu a esta destrucción xeneralizada del nuestru patrimoniu", comentó.
La propuesta d'Asturias Ganadera ye que los arqueólogos que faigan los estudios y el siguimientu d'obres dependan de la Conseyería de Cultura "pa evitar que'l criteriu técnicu qude menospreciáu poles presiones económiques y llaborales de les empreses".
"Esperamos que se tomen yá les midíes qu'en cuarenta años nun s'implementaron, y pidimos a la Universidá que denuncie como facemos nós, y esixa a l'Alministración que cesen estes falcatrúes", añadió.
