Asturies activa un protocolu p'atender les mancadures oculares por esposición solar

   UVIÉU, 11 Ago. (EUROPA PRESS) -

   La Conseyería de Salú del Gobiernu del Principáu, al traviés del Serviciu de Salú del Principáu d'Asturies (Sespa), ellaboró un protocolu empobináu a profesionales d'atención primaria y de los servicios d'urxencies pa la detección y atención de posibles mancadures oculares asociaes a la observación del eclís solar que se va producir esti miércoles, día 12 d'agostu.

   El documentu, ellaboráu pol oftalmólogu Juan Jesús Barbón, del Hospital Universitariu San Agustín d'Avilés, y l'oftalmóloga Raquel Salazar, del Hospital de Xarrio, busca ufiertar una respuesta rápida y homoxénea énte pacientes que presenten síntomes visuales en reparando'l fenómenu astronómicu.

   La guía estrema dos tipos principales de mancadures: la retinopatía solar, qu'afecta a la retina, y la queratitis actínica o fotoqueratitis, qu'estropia la superficie del güeyu.

   La retinopatía solar suel producise ensin dolor y pue manifestase hores dempués de la esposición con visión borrosa, llurdios nel campu visual o distorsión de les imáxenes. El protocolu establez como pasos iniciales valorar la presencia de dolor, midir l'agudez visual de cada güeyu y percanciar información sobre'l tiempu d'esposición, la protección utilizada y los antecedentes oftalmolóxicos del paciente.

   Coles mesmes, recueye les pruebes básiques que puen realizase n'atención primaria y urxencies y señala que tou barruntu de retinopatía solar tien d'unviase a oftalmoloxía. La derivación va ser urxente cuando esista una perda significativa de visión, escotoma central billateral o dolor intensu persistente.

   La fotoqueratitis afecta a la córnea y la conxuntiva y provoca dolor intensu, sensación de cuerpu estrañu, lagrimeo y fotofobia. Na mayoría de los casos, la recuperación ye completa nun plazu de 24 a 72 hores. El tratamientu inicial ye sintomáticu y inclúi reposu, compreses fríes, analgesia oral, llárimes artificiales ensin conservantes y retirada temporal de les lentes de contactu.

   El protocolu desaconseya espresamente l'usu domiciliariu d'anestésicos tópicos, yá que puen retrasar la cicatrización y despintar posibles entueyos. Amás, el documentu detalla los fármacos y el material d'esploración oftalmolóxica que tienen de tar disponibles nos centros d'atención primaria.

   Salú aportuna en que la meyor midida ye la prevención y recuerda que l'eclís solo tien de reparase con gafes homologadas con filtru certificáu ISO 12312-2. Les gafes de sol convencionales y otros métodos caseros, como radiografíes, cristales afumaos o CD, nun ufierten protección abonda frente a la radiación solar y nun tienen d'utilizase, según el Gobiernu asturianu.