UVIÉU, 10 Jul. (EUROPA PRESS) -
El Principáu d'Asturies, col so presidente Adrián Barbón a la cabeza, rindió esti vienres un homenaxe a les víctimes del coronavirus na rexón. Toes elles van permanecer pa siempre na aldordanza colos cinco texos y la placa que dende güei permanecen na contorna del Hospital Central Universitariu, HUCA.
Adrián Barbón abrió col so discursu un actu "cenciellu pero emotivu", según afirmaron dellos asistentes. Nesa intervención el Xefe del Executivu asturianu afirmó que-y prestaría nomar "ún a ún a toles víctimes", "llamales a toes en voz alta pa que cuaye nesa memoria la semeya completa de les sos vides".
"Tamos obligaos coles nuestres amistaes, colos nuestros padres y les nuestres madres; n'especial, tamos en delda coles nuestres persones mayores porque la enfermedá buscó'l llutu ente los más débiles", dixo Barbón, que tamién usó l'asturianu pa facer alcordanza de los mayores y del respetu a los güelos como seña d'identidá de los asturianos.
El presidente tamién aseguró que nel andanciu "aprendimos, o quiciabes recordamos, que les persones esenciales yeren les sanitaries, les qu'atendíen les residencies, les que cuidaben, les caxeres de los supermercaos, les que calteníen abiertes les farmacies o despachaben nes panaderíes, les que llimpiaben, barríen o vixilaben les cais".
"Güei equí, esti mediudía de xunetu, merecen otra vuelta la nuestra alcordanza y el nuestru aplausu", añadió Barbón, que destacó a tolos que quixeron participar nel actu "ensin apartase nin sentise estraños cola convocatoria del Gobiernu".
Barbón resaltó tamién el llabor del HUCA, "con un llaboratoriu que nos dexó reaccionar con capacidá mayor" y dixo qu'eso yera un méritu de tolos gobiernos anteriores pola construcción del nuestru sistema sanitariu, primer muria contra la enfermedá.
Sobre si vamos salir meyores depués d'esta crisis, Barbón aseguró que "eso entá nun sabemos si va ser cierto porque depende de les nuestres manes y les nuestres voces, porque somos nós los que tenemos agora que falar, construyir, llevantar como ellos enantes fixeron".
Depués del so discursu y acompañáu del soníu de la gaita de Pablo Carrera interpretando "La marcha d'Antón 'el neñu'", la marcha fúnebre tradicional asturiana, Barbón depositó un ramu de flores xunto los texos que van recordar a les víctimes. Depués lleeron un poema de la vilba de Luis Sepúlveda, el primer paciente de coronavirus rexistráu na rexón.
Al actu asistieron tolos miembros del Gobiernu asturianu, amás de diputaos naciones como Adriana Lastra o María Luisa Carcedo; diputaos de tolos grupos parllamentarios asturianos; diputaos del PP y Foru nacionales; la delegada del Gobiernu, representantes de la Xudicatura, de les Fuercies y Cuerpos de Seguridá; l'alcalde d'Uviéu o l'Arzobispu ente otres autoridaes.
