El Principáu lleva un descensu de trés diputaos nel Congresu dende 1977
UVIÉU, 22 Feb. (EUROPA PRESS) -
Asturies lleva una década rexistrando un descensu significativu y constante de la población, al pasar de 1.085.289 habitantes en 2009 a los 1.028.244 d'esti 2018 pasáu, según datos del Institutu Nacional d'Estadística. Una tendencia que, en cinco años, podría suponer baxar del millón d'habitantes y, por eso, perder ún de los dos senadores por designación autonómica que tien anguaño la comunidá.
Ello ye que les proyecciones de la Sociedá Asturiana d'Estudios Económicos y Industriales (Sadei) apunta qu'en 2024 la población asturiana baxaría del millón, con una estimación de 994.473 habitantes. Una circunstancia que va resultar clave pal númberu de representantes por Asturies nel Senáu.
La mayor parte de los senadores escuéyense directamente pola ciudadanía en circunscripciones provinciales nos comicios xenerales, con cuatro escaños por cada provincia. Sicasí, tamién hai senadores designaos polos parllamentu autonómicos, que se distribúin a razón d'ún fixu por cada comunidá y otru por cada millón d'habitantes.
Asturies cunta, anguaño, con seis senadores: cuatro escoyíos nes elecciones xenerales y dos designaos pola Xunta Xeneral. D'esta forma, si'l Principáu queda perbaxu del millón d'asturianos a partir de 2024, como indiquen les proyecciones de Sadei consultaes por Europa Press, la Xunta Xeneral namás va designar un escañu pa la Cámara Alta.
La pérdiga d'un senador a partir del llustru próximu súmase al descensu actual de representación nel Congresu de los Diputaos. El Ministeriu del Interior yá confirmó qu'Asturies va baxar de 8 a 7 escaños nel Congresu nes elecciones xenerales próximes.
Nun ye la primer vez qu'Asturies pierde un diputáu. El Principáu foi perdiendo representación nes últimes décades y el 28 d'abril va escoyer trés diputaos menos qu'en 1977, cuando la comunidá cuntó con diez parlamentarios na Cámara Baxa.
Y ye que los 350 escaños qu'integren el Congresu de los Diputaos asígnense a les circunscripciones por un procedimientu dual: 102 distribúyense de manera fixa o invariable, y los 248 restantes distribúyense en función de la población de les provincies.
Les variaciones prodúcense nos 248 escaños de reasignación periódica, al distribuyise ente les provincies al convocase cada elección "en función de la so población", polo que puen variar d'una a otra elección. Nesta ocasión, Asturies y Valencia pierden un escañu caúna, mentes que los ganen les provincies de Madrid y Barcelona.
