UVIÉU, 6 May. (EUROPA PRESS) -
El presidente del Principáu, el socialista Adrián Barbón, indicó esti llunes que güei mesmu va cursase la invitación a tolos grupos parllamentarios "pa una xunta conxunta, que va ser na segunda quincena del mes de mayu" pa buscar el consensu pa llograr la oficialidá del asturianu y del gallego-asturianu. Nesti sentíu, Barbón indicó en qu'esta vez "va llegar hasta'l final" y mostró'l so enfotu en cuntar col apoyu del PP, al que pidió "valentía y audacia".
El presidente manifestábase asina na so visita a la esposición de Conceyu Bable nel Archivu Históricu d'Asturies. Indicó que "yá hai fecha pa esa xunta colos grupos" a la qu'aseguró yá va llevar una propuesta concreta na que se va buscar el consensu pa modificar "namás l'artículu 4 del Estatutu".
"Y nun solu la voi llevar ellí, voi intentar zarrar un alcuerdu con tolos grupos que quieran pa presentar una proposición de llei na Xunta Xeneral de Reforma al Estatutu d'Autonomía namás del artículu 4", dixo Barbón. Esplicó que pa la so toma en consideración namás se precisa mayoría simple, va ser depués cuando, depués de la comisión parllamentaria, vaiga otra vuelta al Plenu onde yá se precisa mayoría reforciada pa la so aprobación.
Nesti sentíu, el presidente asturianu indicó que nesi momentu "yá nun valen les medies tintes, yá nun-y val l'astención". "Esto ye, toa astención na votación definitiva va ser considerada a efectos de la votación definitiva un non. Y hai qu'evitar esi non. Polo tanto, yo lo qu'animo, la reflexón que faigo a los grupos parllamentarios, ye que lóxicamente contribuyan al consensu", dixo Barbón.
Manifestó que de la negociación anterior sobre esta cuestión "yá aprendió les llecciones", porque la mesma "enquistóse por munchos temes, porque s'entemecieron coses, porque diba más allá del artículu 4, esto ye, el que tien que ver cola oficialidá". Y reconoció que "foi un error" nun llevar la propuesta a votación. Por eso agora asegura que tien claro que "va llegar hasta'l final".
"Foi un error que yo cometí la llexislatura pasada y arrepiéntome. Creo que m'enquivoque, creo que tenía que llegar hasta l'últimu tren, que teníamos que votalo na Xunta", dixo.
Asina destacó que va dir al Parllamentu con una propuesta concreta pa facer intentos de verdá d'aceptación. Nesti sentíu, mostró'l so enfotu en que finalmente tenga l'apoyu del PP. "Yo confío que sí, y espérolo de corazón. Pero tanto como espero que voten que sí a eso, la reflexón que traigo al Partíu Popular n'Asturies, ye qu'espero que faigan un exerciciu de responsabilidá, camuden la posición histórica. Igual que la camudó la FSA", dixo Barbón.
Indicó que yá escuchó delles veces al dirixente del PP, Álvaro Queipo "que quier ser como'l PP gallegu y el PP gallegu nunca tuvo un problema col tema identitariu o'l llingüísticu". "Yo espero de corazón, y equí faigo una reflexón, pa que sían valientes y camuden esa posición y voten a favor. Non val con que se refuxen na astención", indicó.
