Afirma que'l Gobiernu ta trabayando pa que'l Principáu sía ún de los polos de la futura rede europea del hidróxenu
UVIÉU, 27 Oct. (EUROPA PRESS) -
El presidente del Gobiernu asturianu, el socialista Adrián Barbón anunció esti martes la creación d'una cátedra universitaria de la tecnoloxía 5G que va tar dotada con 100.000 euros anuales. Enmárcase nuna estratexa que busca convertir al Principáu "nun sitiu afayadizu pa vivir y trabayar".
Na so intervención inicial nel debate d'orientación política na Xunta Xeneral, Barbón realizó esti anunciu nel marcu de les sos considerancies sobre la relevancia del desarrollu científicu y técnolóxicu. Nesi puntu resaltó Barbón la creación de l'Axencia de Ciencia y Innovación n'Asturies.
"Les empreses yá tán dexando buelga del so apueste, con proyectos como l'alianza ente Arcelor y EdP pa la quema de gases siderúrxicos o l'usu de gas de cok pa producir aceru", indicó Barbón, qu'añadió que la Conseyería d'Industria ta liderando un importante esfuerciu pa qu'Asturies sía ún de los polos de la futura rede europea del hidróxenu
Nesa mesma llinia, Barbón resaltó la convocatoria de la Conseyería de Ciencia p'atraer y consolidar los centros d'I+D de grandes empreses al traviés d'una llinia d'ayudes que va perpasar los cuatro millones.
"Toes eses iniciatives, a les que podemos añadir otres rellacionaes cola biomasa, los almacenes enerxéticos o la producción eólica, van texendo la urdimbre de l'Asturies industrial nueva", apuntó.
AGUA
En materia medio ambiental, Barbón esplicó que nes selmanes próximes el Gobiernu va presentar el Plan de Suministru 2021-2030, que va impulsar relevantes inversiones pa garantizar el suministru, mesmo si se confirmaren les previsiones más estremes sobre'l cambiu climáticu.
"Cuando ellaboremos el Plan de calidá del Aire pa tola comunidá vamos reforciar a Asturies como llugar afayadizu pa vivir y trabayar", comentó.
Amás, esplicó que se van dedicar 8,1 millones a estender el billete únicu. "A partir de 2021, va ser posible viaxar en tresporte públicu con una tarxeta monederu ensin caducidá y realizar los pagos, recargar y les consultes de manera dixital. Non yá potenciamos el tresporte públicu, tamién amenorgamos contaminación de la que favorecemos la movilidá sostenible. Eso tamién ye pensar nel porvenir", dixo Barbón.
Amás, Barbón comprometióse a dar un "emburrión cuasi definitivu" a la espansión de la banda ancha, que va cubrir el 97% del territoriu. En 2021 ta previstu qu'algame 42.800 viviendes y empreses.
"Como dixo la Conseyería de Ciencia, podemos dicir con toles lletres qu'avanzamos hacia una Asturies hiperconectada, coles ventayes que va traer pa l'actividá profesional y empresarial. Vamos satisfaer una demanda histórica, el zarru de la resquiebra dixital", dixo.
