UVIÉU, 27 Oct. (EUROPA PRESS) -
El presidente del Principáu, el socialista Adrián Barbón nun quixo dexar de destacar na so intervención nel Debate d'Orientación Política la orientación feminista del gobiernu y manifestó qu'aspiren a que la igualdá sía otru trazu qu'identifique Asturies porque ye "consustancial a les sociedaes avanzaes".
Barbón, que recordó que nel so Executivu hai mayoría femenina y feminista, reconoció qu'en materia d'igualdá "entá-yos queda muncho por avanzar" y con esi propósitu, la concertación incluyó pela primer vez na so hustoria una mesa específica sobre igualdá y amás el Plan Estratéxicu d'Igualdá va presentase enantes de final d'añu.
"Una comunidá moderna tien que frañar cola estructura social vieya na que namás una metá de la población tenía accesu a la calidá de vida, recursos y desarrollu profesional. Con esi enfotu, la Escuela d'empresaries convirtióse nel Centru d'innovación y economía n'igualdá, que prepara pa 2021 la primer feria d'emprendedores", dixo Barbón.
Amás quixo remarcar que nesa Asturies nun pue tener sitiu la violencia machista polo que tán comprometíos en combatila al traviés de tolos medios. Nesti sentíu adelantó que nes selmanes próximes va abrir n'Uviéu'l Centru de Crisis pa Víctimes d'Agresiones Sexuales, con capacidá pa ufrir atención a les muyeres dende'l primer minutu tolos díes del añu y a cualquier hora.
Tamién destacó que la Conseyería de Presidencia ta promoviendo, en collaboración cola de Cultura, la creación d'un distintivu autonómicu pa calificar a les federaciones, clubes o asociaciones deportives como entidaes llibres de LGTBIfobia.
