UVIÉU, 29 Abr. (EUROPA PRESS) -
El presidente del Principáu y secretariu xeneral de la FSA-PSOE, Adrián Barbón, compareció énte los medios pa facer una primer valoración del anunciu de Pedro Sánchez de siguir alantre col so mandatu y indicó qu'espera que "estos cinco díes valieren pa principiar una etapa nueva en política". El presidente asturianu consideró que cola decisión de Sánchez "la esperanza venció al mieu y eso ye lo importante".
"Espero qu'estos cinco díes valiérannos pa reaccionar, que valieran pa que la sociedá se de cuenta de qu'asomemos, si me dexen la espresión, cuasi al desbentíu", dixo Barbón.
Adrián Barbón, acompañáu de los miembros de la Executiva de la FSA mostró "la enorme satisfación de la FSA y de los y les militantes de la FSA". "Tamos mui contentos y nun lo queremos nin podemos esconder", dixo'l presidente asturianu, qu'aseguró que "la esquierda política d'Asturies y los demócrates d'esta comunidá autónoma, güei alendaron aliviaos cola decisión del presidente".
Considera Barbón que lo que pasó estos cinco díes nos que se tuvo a puntu de ver como un presidente del gobiernu dimitía "énte l'acosu, énte lo que taba pasando, énte'l clima tóxicu de la política" tien que treslladar a toos la reflexón de qu'entá se ta a tiempu de facer una política bona, de defender una democracia plena y avanzada.
Repitió que la cuestión nun diba namás de Pedro Sánchez y destacó la importancia del plan de rexeneración anunciáu pol presidente. Asina, preguntáu que va pasar d'equí p'alantre indicó que "correspuende al propiu presidente liderar la rexeneración democrática qu'anunció".
"Esto ye un puntu de ruptura y yá nada va ser lo mesmo", dixo Barbón, qu'añadió que "la dimisión d'un presidente nunca pue ser bona".
