UVIÉU, 14 Nov. (EUROPA PRESS) -
El secretariu xeneral de la FSA, Adrián Barbón, señaló que la llucha contra'l despoblamientu, el futuru de la industria y la finalización de les infraestructures claves p'Asturies van ser los asuntos claves colos que se presente a les elecciones autonómiques de mayu.
El líder de los socialistes asturianu díxolo asina esti miércoles nun actu políticu n'Uviéu nel que compartió tribuna col ministru de Fomentu y secretariu d'Organización del PSOE, José Luis Ábalos.
Barbón indicó que van ellaborar un programa de Gobiernu "seriu, de rigor y con ilusión, pero colos pies na tierra, abiertu a la cai y a los problemes reales".
Asina, afitó la llucha contra'l despoblamientu como ún de los problemes grandes d'Asturies "non yá de la del futuru sinón de la del presente". Nesi sentíu, quixo valorar que'l Gobiernu central punxera en marcha una estratexa nacional contra la despoblación.
Per otru llau, sobre'l tema industrial --y depués de facer un incisu p'apoyar la llucha de los trabayadores d'Alcoa-- reivindicó un futuru industrial pa la rexón y recordó que'l Gobiernu de Rajoy nun definió una tarifa eléctrica competitiva pa les empreses electrointensives.
No que tien que ver con infraestructures indicó qu'acabar obres como la Variante de Payares ye fundamental, pero que nun se-y podía pidir a un Gobiernu que lleva cinco meses "lo que Rajoy nun fixo en siete años".
"Como presidente futuru voi esixi-y rigor y seriedá, que ye lo que nun tuvo Rajoy", indicó Barbón a Ábalos, pa recordar que "perriba de too tán los intereses d'Asturies".
ENSIN PALABRES PAL ASTURIANU
A lo que nun fixo referencia Adrián Barbón ye a les polémiques declaraciones del presidente del PP, Pablo Casado, qu'esti martes acusó a los socialistes asturianos de querer oficializar una llingua "que nun fala naide".
Les palabres de Casado xeneraron les crítiques n'Asturies de partíos como Podemos o d'instituciones como l'Academia de la Llingua. El mesmu secretariu xeneral de la formación morada, Pablo Iglesias, sumóse a les crítiques al traviés de twitter col hashtag #fálaseasturianu, qu'a lo llargo de tola tarde foi TT nel conxuntu del Estáu español.
Mentanto, dende'l Gobiernu asturianu nun quixeron entrar nes crítiques al líder de los 'populares' y el conseyeru de Presidencia y portavoz del Executivu, Guillermo Martínez, refugó opinar sobre les sos palabres cuando-y preguntaron na rueda de prensa posterior al Conseyu de Gobiernu.
Too eso a pesar de que la militancia de los socialistes asturianos aprobó nel 32 Congresu apoyar la oficialidá pa la llingua asturiana, una midida que defendió públicamente la Executiva nueva del partíu. Sicasí, esti miércoles nel so discursu, Adrián Barbón refugó les crítiques a Pablo Casado pol tema llingüísticu.
