UVIÉU, 18 Sep. (EUROPA PRESS) -
El presidente del Gobiernu del Principáu d'Asturies, el socialista Adrián Barbón, garantizó esti vienres a les families asturianes que'l so Executivu va trabayar xunto la comunidá educativa pa que los centros educativos sían "los espacios más seguros".
Barbón incidió, sicasí, en qu'hai que ser "conscientes" de que'l riesgu cero nun existe nunca nun andanciu "d'esti tipu". Asina, señaló que nun existe "riesgu cero de contaxu" nin na sede de la Presidencia, nin na Xunta Xeneral, nin cuando se queda con amigos o familiares a tomar daqué en casa o nun chigre, nin en cualquier actividá o cuando se va al hospital y, polo tanto, "nun existe riesgu cero tampoco nes aules".
"El riesgu cero nun existe y esto ye una realidá; pero nun tiempu nel que falta seguridá, lo que puedo dicir a los asturianos y asturianes ye que tengan la seguridá de vamos facer tolo que tea nes nuestres manes pa que los espacios educativos sían los espacios más seguros", remarcó en rueda de prensa.
Barbón señaló que los centros tán afaciendo los protocolos de seguridá del Principáu pa la vuelta a clase y que l'alministración autonómica aprovechó estos díes tamién pa "siguir de cerca" l'actuación d'otres comunidaes y países, y aprender de "la realidá comparada".
