"L'asturianismu nun se diz, practícase", diz el presidente
UVIÉU, 8 May. (EUROPA PRESS) -
El presidente del Principáu y secretariu xeneral de la FSA, Adrián Barbón, afirmó que van llevar a la Xunta Xeneral el debate de la oficialidá porque asina va poder vese qu'hai "una mayoría de la Cámara que demuestre qu'hai un apoyu mayoritariu de la sociedá asturiana espresáu democráticamente al traviés de les urnes".
Barbón convocó los grupos parllamentarios pal 23 de mayu pa tratar una propuesta de reforma del artículu cuatro del Estatutu pa reconocer la oficialidá del asturianu y del gallego-asturianu. Pa sacala alantre faen falta 27 votos favorables.
PSOE, Convocatoria por Asturies y la diputada Covadonga Tomé, espulsada de Podemos, sumen 23 votos, polo qu'amás del apoyu del diputáu de Foru Asturies --que na llexislatura pasada reclamó como contrapartida unes midíes fiscales que finalmente paralizaron la reforma énte la negativa d'IX a asumiles-- va facer falta el 'sí' del PP.
Sicasí, el presidente actual de los 'populares' asturianos, Álvaro Queipo, anque defendió la protección de la llingua propia y se declaró asturianista, recordó nos últimos díes la so postura contraria a la oficialidá porque implicaría "obligatoriedá" y que nun llevaben la reforma del Estatutu nel so programa electoral.
A pesar d'esto, Barbón insistió en que'l PSOE asturianu recueye la oficialidá nel so programa dende 2017 y qu'agora decidieron abrir esti debate depués de que'l Día de les Lletres Asturianes, el presidente de l'Academia de la Llingua, Xosé Antón González Riaño, planteara la oportunidá d'intentalo "porque paecía qu'había dalgún cambiu en dalgún actor políticu", según Barbón, qu'añadió qu'esi cambiu "nun yera tan real" y yera "maquillaxe".
Con too, el xefe del Executivu resaltó la necesidá de llevar el debate a la Xunta Xeneral. Pa eso, va convocar una xunta con tolos grupos parllamentarios menos Vox pa "sentar a tol mundu" y "intentalo", cola mediación de la mesma Academia de la Llingua "pa facilitar precisamente que nun se polarice, que nun s'encrespe".
"Vamos plantear un testu, vamos debatilu, vamos intentar alcordar, salga lo que salga vamos llevar esa proposición de reforma del Estatutu d'Autonomía a la Xunta. Va votase la so toma en consideración, va llevase a comisión y va haber una votación definitiva", esplicó Barbón.
Asina, quixo aclarar qu'anque nun axunten los 27 votos necesarios pa tener la mayoría que precisa una reforma del Estatutu, si va haber una mayoría de la Cámara "que demuestre qu'hai un apoyu mayoritariu de la sociedá asturiana espresáu democráticamente al traviés de les urnes". Nesi sentíu, quixo dexar claro que "l'asturianismu nun se diz, practícase", recordando les palabres del presidente Pedro de Silva.
