UVIÉU, 29 Sep. (EUROPA PRESS) -
El presidente del Gobiernu asturianu y secretariu xeneral de la Federación Socialista Asturiana (FSA), el socialista Adrián Barbón, consideró esti xueves xustes les midíes fiscales nueves anunciaes pola ministra de Facienda, María Jesús Montero.
"Llámase xusticia fiscal", escribió Barbón na so cuenta de la rede social Twitter depués de que Montero anunciara un paquete qu'inclúi un impuestu nuevu a les grandes fortunes, xubir un puntu la tributación nel IRPF de les rentes perriba de 200.000 euros y midíes nesi impuestu pa favorecer a les rentes medies y baxes.
"O lo que ye lo mesmo, que paguen menos les rentes de les clases trabayadores y paguen más impuestos los que más ganen y les grandes fortunes", dixo Barbón.
El presidente asturianu comentó que les midíes anunciaes pol Gobiernu nun suponen en nengún casu baxar los impuestos a tol mundu, dalgo que sería "inxusto y insolidario".
Un usuariu preguntó-y a Barbón sobre la diferencia qu'hai ente lo anunciao pol Gobiernu y baxar l'IRPF a los tramos más baxos, a lo que'l socialista respondió que l'IRPF hai que pagalo por tramos. "Si baxes, por exemplu, los tramos de menos de 60.000 euros significa qu'a min, por exemplu, tamién me baxes l'IRPF por 60.000 de los 70.000 euros que cobro. Namás siguiría pagando lo mesmo, por 10.000 euros. Esto ye, pagaría menos", indicó.
Sicasí, cola propuesta de Montero, Barbón dixo que va siguir pagando los mesmos impuestos, non menos. "Por eso la famosa deflactación ye una midida inxusta, porque baxa los impuestos tamién a los que ganen más. Hai que protexer sobremanera a clases medies y clases trabayadores", dixo.
Barbón resaltó que la propuesta del Gobiernu, ente otres midíes, supón l'aumentu del amenorgamientu por rendimientos del trabayu de 18.000 a 21.000 euros y hasta 15.000 euros nun habría que facer la declaración. "Eso beneficia al 50% de los ciudadanos. A ellos baxaríense-yos los impuestos", esplicó.
