9 de abril de 2020
 
Actualizado 04/06/2018 19:01:20 +00:00 CET

La BBC tuvo esti fin de selmana n'Asturies grabando'l programa 'Port', centráu na música y na llingua asturiana

Grabación de Port n'Ambás.
XOSÉ ANTÓN AMBÁS.

TPA va emitir l'espaciu nel últimu trimestre d'anguaño

UVIÉU, 4 Jun. (EUROPA PRESS) -

Esti fin de selmana un equipu d'una productora escocesa tuvo n'Asturies grabando'l programa 'Port', una coproducción de la televisión escocesa BBC Alba y la irlandesa TG4. L'espaciu va dedicar un capítulu a mostrar les conexones de la música asturiana cola del restu de naciones celtes, amás de dar protagonismu a la llingua asturiana como vehículu de tresmisión de toa esa cultura.

'Port' ye un espaciu musical que s'emite dende hai tres temporaes n'Escocia y Irlanda y que muestra les semeyances ente la música y la cultura de los dos países, siempre col gaélico-irlandés y gaélico-escocés como llingua de comunicación.

Nél, dos conocíes cantantes y multi-instrumentistes de música celta, la escocesa Julie Fowlis y la irlandesa Muireann Nic Amhlaoibh, percuerren dellos llugares pa conocer la tradición musical de cada sitiu.

Pa la cuarta temporada, l'equipu del espaciu decidió espandise y frutu de la collaboración ente les televisiones rexonales europees dio'l saltu a Bretaña, Asturies y Galicia. Asina, nos últimes díes, la productora tuvo grabando un capítulu en Galicia y a lo llargo d'esti fin de selmana n'Asturies.

Na grabación de 'Port' n'Asturies intervinieron Rubén Bada, Tuenda, Tejedor, Anabel Santiago, Silvia Quesada y Rubén Alba. Tolos participantes interpretaron temes n'asturianu en collaboración con músicos irlandeses y escoceses. Asina, l'espaciu busca mostrar les conexones ente les cultures del Arcu Atlánticu.

Otra manera, la productora del proyectu, la escocesa Bees Nees, escoyó les localizaciones de la Capiya de los Dolores y Ambás, en Grau; y el chigre L'Esperteyu, n'Uviéu, onde unos bailladores van mostrar a tola audiencia europea como ye'l baille asturianu.

'Port' tamién va dar protagonismu a la gastronomía asturiana con escenes grabaes na Quesería Ca Sanchu, n'Ambás, y con una entrevista en Xixón al cocineru Nacho Manzano, gallardonáu con una estrella Michelin.

Per otru llau, nel espaciu va participar Celestina ca Sanchu, nacida en 1922 n'Ambás y una de les más reconocíes informantes y tresmisores de la cultura inmaterial asturiana. Según esplicó'l músicu Rubén Bada a Europa Press, na grabación de les escenes de Celestina, l'equipu de 'Port' "llegó llorar de la emoción".

Nesi sentíu, Bada, que valió de músicu d'apoyu n'Asturies a la grabación, indicó que l'equipu tenía muncho interés en que los músicos y les lletres de los cantares tuvieren n'asturianu pa que'l públicu del restu d'Europa pudiera conocer de primera mano como ye'l nuestru idioma. Mesmamente, les presentadores de 'Port' ensayaron les preguntes n'asturianu pa poder facer les entrevistes a los músicos nesta llingua.

Esta serie musical, que se compón de seis episodios d'una hora de duración, va ser emitida a partir del últimu trimestre del añu na canal irlandesa TG4, na escocesa BBC Alba, na TPA d'Asturies y na Televisión de Galicia.