UVIÉU, 30 Abr. (EUROPA PRESS) -
El Muséu de Belles Artes va acoyer hasta'l 12 de mayu la esposición 'Conceyu Bable y l'arte asturianu contemporaneu', que recueye la obra d'artistes asturianos que taben trabayando nel momentu que surdió l'asociación que diba marcar la moderna reivindicación asturianista y el procesu de recuperación de la cultura asturiana.
El director xeneral d'Acción Cultural y Normalización Llingüística, Antón García, y el director del Belles Artes, Alfonso Palacio, presentaron esti martes la muestra, entamada dientro de les actividaes de la Selmana de les Lletres Asturianes, qu'anguaño ta dedicada a la histórica asociación Conceyu Bable, y que supón que la pinacoteca reordenara los fondos de la sala 24 del Edificiu Ampliación.
Recueye dellos creadores nacíos ente 1930 y 1950, como José María Navascués, José María Legazpi, María Jesús Rodríguez, José Miguel García Galano o Adolfo Manzano, ente otros. Pintura, escultura y fotografía que muestren les conexones de la cultura asturiana y el territoriu cola modernidá y la vanguardia cultural. Son 34 obres de 31 artistes de les qu'once nun formen parte de la esposición permanente.
El Belles Artes va acoyer esti martes a les 18.00 hores una visita n'asturianu pola muestra. Una hora depués va haber un espectáculu poético-musical que va homenaxar la canción asturiana. Va ser a les 19.00 hores nel Palaciu de Velarde.
"MUSÉU DE BELLES ARTES"
El director xeneral d'Acción Cultural y Normalización Llingüística, Antón García, recordó que'l primer Día de les Lletres Asturianes, celebráu en 1980 pola Diputación provincial, celebróse nel Muséu de Belles Artes, que naquel momentu tenía una denominación billingüe qu'incluyía 'Muséu de Belles Artes'.
Nesi sentíu, preguntáu por si na Conseyería existía una planificación pa que tola cartelería de los equipamientos culturales dependientes del Principáu tuviera tamién n'asturianu, García esplicó que "ye dalgo que vamos faciendo pasín a pasu".
Asina, recordó que l'exemplu ye Llaboral-Ciudá de la Cultura y el Muséu del Xurásicu. "Pasín a pasu vamos consiguiendo que l'asturianu tea presente en tolos equipamientos que dependen de la Conseyería de Cultura", señaló.
