El BOE publica'l Calendariu Llaboral del 2027, con doce festivos n'Asturies

Europa Press

   UVIÉU, 13 Oct. (EUROPA PRESS) -

   El Boletín Oficial del Estáu (BOE) publicó esti martes el calendariu llaboral del 2027, que recueye un total de 9 festivos que se van celebrar de forma conxunta en toa España y 12 en total nel Principáu d'Asturies coles fiestes rexonales.

   El calendariu empieza cola fiesta d'Añu Nuevu, qu'en 2027 va cayer en vienres, dexando la primer ponte festiva del añu. Sígue-y el 6 de xineru cola Epifanía del Señor, en miércoles.

   Nel 2027 la Selmana Santa adelántrase al respective del 2026, col Xueves Santu y el Vienres Santu --dambos festivos n'Asturies-- los díes 25 y 26 de marzu. Nun va haber ponte del Día del Trabayador, 1 de mayu, al coincidir la festividá en sábadu.

   Yá dempués del branu, la fiesta de l'Asunción de la Virxe, que cai en domingu, fái que pase'l festivu al llunes 16 d'agostu. En cuanto al 8 de setiembre, Día d'Asturies, anguaño va cayer en miércoles.

   L'últimu tramu del 2027 contempla'l festivu de la Fiesta Nacional el 12 d'ochobre, que cai de martes; y el 1 de payares, día d'ánimes, ufierta otru nuevu ponte al cayer de llunes. Finalmente, la Ponte de la Constitución, qu'apigura los festivos del Día de la Constitución el 6 d'avientu y el de la Inmaculada Concepción el 8, cai de llunes y miércoles. Cierra los festivos del calendariu llaboral del 2027 el día de Navidá, que d'esta vuelta va cayer en sábadu.

FESTIVOS LOCALES

   A estes xornaes festives, súmense en caún de los 78 conceyos asturianos los sos propios díes de fiesta, publicaos nel Boletín Oficial del Principáu d'Asturies (BOPA) el pasáu mes de mayu.

   N'Uviéu van ser fiesta los díes 18 de mayu (Martes de Campu) y el 21 de setiembre (San Mateo); en Xixón, el 9 de febreru (Antroxu) y el 29 de xunu (San Pedro; n'Avilés, el 29 de marzu (Llunes de Pascua) y el 28 d'agostu (San Agustín).

   En Siero cunten con trés festivos locales, el 30 de marzu (Güevos Pintos, en tol conceyu), 19 de xunetu (el Carmín, en tol conceyu sacantes Llugones) y el 30 d'agostu (Santa Isabel, en Llugones). En Mieres tamién hai trés festivos, los díes 24 de xunu (San Juan, en tol conceyu sacantes el Valle de Turón), el 14 de setiembre (festividá del Santísimu Cristu de la Paz, nel Valle de Turón), y el 27 de setiembre (Mártires de Cuna, en tol conceyu).