Actualizado 25/06/2019 13:46 CET

Cada nivel de competencia d'asturianu va tener cinco exámenes y va necesitase una media de 6 sobre 10

EUROPA PRESS - Archivo

UVIÉU, 25 Jun. (EUROPA PRESS) -

Les pruebes de competencia d'asturianu adaptaes al Marcu Común Européu de Referencia de les Llingües van tener cinco niveles. Pa superar caún d'ellos va haber que facer cinco exámenes con una puntuación media de 6 sobre 10 nel conxuntu de los mesmos.

Asina se recueye nel decretu aprobáu pol Conseyu de Gobiernu pol que s'establecen los niveles de competencia nel usu de la llingua asturiana y se regula la prueba de certificación correspondiente a los niveles mentaos adaptaos al Marcu Común Européu de Referencia de les Llingües, al que tuvo accesu Europa Press.

Asina, va haber cinco niveles de competencia --Básicu 1, básicu 2, intermediu 1, intermediu 2 y avanzáu 1--. Pa sacar el certificáu de cada nivel va ser menestar superar una prueba de certificación compuesta por cinco exámenes, ún por caúna de les actividaes que se quier evaluar --comprensión de testos orales, comprensión de testos escritos, producción y coproducción de testos orales, producción y coproducción de testos escritos y mediación--.

La superación de los cinco exámenes d'un nivel y el llogru d'una puntuación media de 6 sobre 10 nel conxuntu de los mesmos va dar derechu al certificáu de superación d'esi nivel de competencia nel usu de la llingua asturiana.

A les persones que nun superen la prueba de certificación va poder espedise-yos una certificación académica d'algamar el grau de dominiu afayadizu pa les actividaes nes que superen l'exame correspondiente.

A les pruebes, que dende esti 2019 van entamase polo menos una vez al añu pa un mínimu d'un de los niveles, van poder presentase tolos mayores de 16 años que van poder presentase al nivel que consideren, ensin necesidá d'un certificáu acreitativu de nivel inferior.

Asturianu ofrecido por