Actualizado 25/09/2018 14:27

CCOO nacional va defender énte'l Ministeriu d'Educación la creación de la especialidá d'asturianu

Rueda de prensa de CCOO sobre educación.
EUROPA PRESS.

UVIÉU, 25 Sep. (EUROPA PRESS) -

La Federación Estatal d'Enseñanza de CCOO quier aconceyar col Ministeriu d'Educación pa reivindicar la creación de la especialidá docente pal profesoráu de llingua asturiana. Nesi sentíu, el sindicatu espera una sensibilidá mayor de la ministra nueva, Isabel Celáa.

Asina lo anunció'l secretariu xeneral del Sindicatu d'Enseñanza de CCOO d'Asturies, Borja Llorente Álvarez, que compareció esti martes n'Uviéu xunto a la secretaria de Llingua Asturiana, Marta Mori, y el d'Universidaes, Ignacio Loy.

Llorente afirmó que quieren una reunión a "nivel máximu" onde esperen ser recibíos pol secretariu d'Estáu d'Educación énte "la inanición de la Conseyería d'Educación". "Si ellos nun lo faen, vamos facelo nós", esplicó.

Per otru llau, depués de ser preguntada polos medios sobre si esperen una sensibilidá mayor d'Isabel Celáa hacia la creación de la especialidá d'asturianu, Marta Mori dixo que "esa esperanza existe" énte la "situación de bloquéu" col Gobiernu anterior del PP.

Nesi sentíu, Mori afirmó que la creación de la especialidá d'asturianu yera una prioridá pa CCOO y indicó qu'esta pue crease independientemente de que l'asturianu sía oficial o non.

La responsable de Llingua Asturiana en CCOO esplicó que nestos momentos existen 300 maestros d'asturianu que tán "condenaos" a la temporalidá, con puestos precarios y ensin ser plantía orgánica del centru. "Un 80% tán a media xornada y nin lleguen a mileuristes", sentenció Mori.

Asturianu ofrecido por