PERTH (AUSTRALIA), 22 Abr. (Reuters/EP) -
La busca del avión malayu sumíu tuvo que ser suspendida esti martes pola apaición d'un ciclón tropical sobre'l sur del Océanu Índicu. La suspensión producióse nun momentu nel qu'un submarín ensin tripular d'Estaos Xuníos averábase a la fin de la so misión ensin atopar restos del avión.
Delles hores dempués de que s'esplegaren diez aviones y diez barcos pa siguir cola busca, les autoridaes decidieron suspender les operaciones aérees como resultáu de les condiciones climatolóxiques derivaes del ciclón tropical 'Jack', mentes que los barcos van siguir realizando les actividaes entamaes.
"Determinóse que les condiciones climatolóxiques tán dando llugar a un mar en males condiciones y poca visibilidá, lo que fai que cualquier xera de busca sía ineficaz y peligrosa", publicó'l Centru de Coordinación Conxuntu d'Axencies nun comunicáu.
Los rastrexos diarios per aire y mar, nos que participen más de 20 países, siguieron dende va una selmana, cuando les autoridaes australianes comunicaron que diben terminar colos sos esfuerzos de busca del vuelu MH370, desaparecíu'l pasáu 8 de marzu.
La suspensión de l'actividá asocedió un día antes del fin programáu de la misión del submarín ensin tripular Bluefin-21. El personal encargáu del so manexu declaró qu'entá esperen atopar restos del avión sumíu.
POSIBLE SEÑAL PROCEDENTE DE LA CAXA NEGRA
Les autoridaes detectaron nel Océanu Índicu delles pruebes que podríen determinar el paradoriu del avión, yá que confíen en que les señales recibíes per unu de los radares correspuéndense coles de la caxa negra del Boeing-777 de Malaysian Airlines.
El submarín ensin tripular tuvo rastrexando'l fondu marín, d'unos 4.500 metros de fondura, mientres la última selmana ensin rexistrar nenguna evidencia sobre'l paradoriu de l'aeronave. Espérase qu'esti submarín complete la so novena misión de busca esti martes, cuatro díes dempués de que'l Centru de Coordinación axustara un plazu de cinco díes pa concluyir l'operativu.
Los responsables de la misión comunicaron que'l Bluefin rexistró dos terceres partes de la área nel que se centren les xeres de busca ensin topar datos d'interés. Les autoridaes desconocen la estratexa que va siguir al esplegue del submarín ensin tripular, que llegó a vese como unu de los elementos que más diben ayudar nes xeres de busca del avión, la más cara de la hestoria de l'aviación.
