UVIÉU, 15 Oct. (EUROPA PRESS) -
El Conseyu de Gobiernu va aprobar l'Anteproyectu de Llei del Principáu d'Asturies de Garantía del derechu a la llibre espresión de la identidá sexual y/o de xéneru na primera quincena de payares, pa depués pasar al plenu de la Xunta Xeneral.
Asina lo anunció'l conseyeru de Presidencia y Participación Ciudadana, Guillermo Martínez, énte una entruga de Podemos Asturies sobre cuándo diben rexistrar en sede parllamentaria l'Anteproyectu d'esta llei.
Según Martínez esta norma ye ún de los compromisos de llexislatura y lleven trabayando nella dos años. Agora, una vez superaos tolos trámites, el Conseyu de Gobiernu va aprobala na primera quincena de payares. L'últimu trámite ye la so votación nel plenu de la Xunta Xeneral, onde los distintos grupos van mostrar el so apoyu o refugu.
Dende Podemos Asturies, la diputada Lorena Gil destacó qu'Asturies sía una de les úniques comunidaes ensin llei trans y recordó les movilizaciones del colectivu LGTB a favor de la mesma.
Per otru llau, criticó que'l secretariu xeneral de la FSA, Adrián Barbón, fuera a la última manifestación del Arguyu Gai de Xixón con una pancarta a favor de l'aprobación d'esta norma "mentes qu'ustedes refúguenla", polo qu'afaló al Gobiernu asturianu a presentar l'anteproyectu de llei en diez díes.
Martínez criticó les palabres de Gil y acusó a Podemos de nun buscar l'aprobación de la Llei Trans "sinón el deméritu de los demás". Asina, defendió presentar la llei "con toles garantíes" pa que pueda salir alantre.
