UVIÉU, 26 Abr. (EUROPA PRESS) -
Coxersa informó esti xueves de que va disponer "a lo llargo de les selmanes vinientes" d'una evaluación de los daños materiales que se producieron sobre la estructura del edificiu, la maquinaria y les instalaciones, depués de la quema declarada esti miércoles na planta de tratamientu de la fracción resto.
Hasta esi momentu, nun va poder determinase con exactitú l'algame del accidente en términos económicos y de plazos, esplicaron dende Coxersa.
Sobre les causes de la quema, los responsables de Coxersa indiquen que too paez apuntar a que l'españíu principió de forma endóxena ente los restos atropaos na zona de recepción de voluminosos (muebles, maderes, colchones o enseres). La zona afectada quedó finalmente circunscrita a la nave A (recepción y pretratamientu) de la Planta de Tratamientu de la Fracción Resto.
Los Bomberos de Xixón abandonaron les instalaciones del consorciu hacia a les 11.45 hores, según esplicaron dende'l complexu. Sicasí, efectivos de Coxersa y de Tragsa tán entá supervisando los restos de materiales y escombros por si se produciera dalgún incidente.
Indicaron que los trabayos dientro de la planta tán consistiendo namás en xeres de llimpieza iniciales y na retirada de materiales xamuscaos. Al empar, caltiénense los llabores d'estracción de la basura entemecida que taba nos fosos nel momentu del empiezu de la quema. Dellos camiones tán treslladando la mesma al vertederu central.
