Los equipamientos del Principáu programen más de 350 actividaes pal últimu trimestre de 2020
UVIÉU, 5 Oct. (EUROPA PRESS) -
La conseyera de Cultura, Política Llingüística y Turismu, Berta Piñán, anunció esti llunes na Xunta Xeneral la creación de circuitos específicos de música, lliteratura, artes plástiques y cultura popular, amás d'una inversión de 140.000 euros nos refuxos de monte dependientes del so departamentu.
La titular de Cultura tamién se refirió a l'actividá de los equipamientos que dependen directa o orgánicamente de la conseyería y qu'hasta finales d'añu van programar 354 actividaes. La ufierta inclúi esposiciones, conciertos, conferencies, meses de debates, talleres, proyecciones cinematográfiques, visites guiaes y actividaes específiques pl públicu infantil.
Piñán enmarcó la creación d'estos circuitos culturales nel apueste del Gobiernu "por llevar la cultura a tolos llugares y, sobre too, a aquellos que tengan menor población y menos recursos". Al so xuiciu, los circuitos "van permitir fixar población nel mediu rural y promocionar el trabayu de los artistes asturianos".
Nesti sentíu, recordó que yá se reinició l'actividá del Circuitu Asturianu d'Artes Escéniques, con una inversión de 150.000 euros, lo que va facer posible la programación de 78 funciones de 44 espectáculos representaos por 27 compañíes en 26 conceyos.
Según esplicó, los circuitos culturales favorecen una "divulgación imprescindible pa los creadores", pero tamién "relevante pa la ciudadanía y pa la vertebración del territoriu". El propósitu del so departamentu ye llevar les obres "a tolos conceyos d'Asturies", al traviés d'una cofinanciación na que'l Principáu va ufrir hasta'l 90% del costu de la producción nos conceyos de menor población y menos recursos.
Sobre la inversión de 140.000 euros nos refuxos de monte, la conseyera afirmó que va ser efectiva esti mesmu trimestre y va afectar a los de Urriellu, H.ou de los Cabrones, Vagarredonda y Vega d'Ariu.
