Asegura que l'Executivu defende l'asturianu "con normalidá dafechu y ensin estridencies"
UVIÉU, 4 May. (EUROPA PRESS) -
La conseyera de Cultura, Política Llíngüística y Turismu, Berta Piñán, aseguró esti martes nel Plenu de la Xunta que van a poner en marcha una Marca de calidá llingüística pa les empreses qu'utilicen l'asturianu na comunicación cola ciudadanía
Nesi sentíu, indicó que la intención del Gobiernu ye usar la llingua propia y potenciar l'usu del asturianu "con normalidá dafechu y ensin estridencies" y aseguró que l'oxetivu del Executivu pasa per impulsar la política en defensa del asturianu dende dos perspectives, la transversalidá y la normalización.
Piñán, en respuesta a una interpelación d'IX sobre la política llingüística, dio cuenta de munches de les acciones del Executivu y destacó por exemplu la collaboración colos órganos asesores como l'Academia de la Llingua Asturiana, que pela primer vez tien un presupuestu de los PXE.
Amás, anunció dalgunes de les midíes que quier desenvolver el so Gobiernu como la puesta en marcha d'una Marca de calidá llingüística pa empreses qu'utilicen l'asturianu na comunicación cola ciudadanía, la estabilización del personal docente d'asturianu y gallego-asturianu, la integración nes escueles oficiales d'idiomes del asturianu o la redacción d'un decretu nuevu sobre la toponimia.
La conseyera, que fixo la so intervención n'asturianu, amás d'esplicar los planes a futuru, tamién fixo un repasu del llabor yá que fixeron en dellos ámbitos, como'l fomentu del so usu nos medios de comunicación, la industria cultural o'l trabayu en materia de toponimia.
La portavoz d'IX Ángela Vallina, defendió que con esta interpellación el so grupu busca contribuyir a abrir una etapa nueva nesta Cámara y ente los partíos políticos, sobre la llingua asturiana y el so usu. Indicó que si la so intervención foi en castellanu foi "de manera pensada, cola naturalidá cola que la sociedá utiliza una llingua pa defender otra".
"El nuestru patrimoniu cultural y intelectual nun pue tar sometíu a polémica nin a espolín políticu. L'ambiente de dixebra namás interesa al estremismu, al qu'hai qu'estremar de l'axenda política. Nesta Cámara, hasta agora, l'usu del asturianu nunca foi oxetu de griesca, nin siquier de polémica, y tratóse siempre cola mesma normalidá cola que la ciudadanía lo vive", indicó Vallina, qu'animó a la conseyera a siguir col so llabor de defensa de la llingua asturiana.
Asina, a xuiciu d'IX, cola llingua namás hai que facer normal nes instituciones lo que yá ye normal na cai, motivu pol qu'aceptaron l'alcuerdu que propunxo'l Presidente de la Xunta Xeneral pal usu del asturianu nesta Cámara.
Aseguró que'l siguiente pasu pa que, pasáu un tiempu, la llingua propia vuelva ser motivu d'unión social, cultural y política tien que ser la declaración d'oficialidá al traviés de la reforma estatutaria y dixo qu'al dar esi pasu de protección y reconocencia del asturianu "toles polémiques van marchar, como pasó siempre coles reformes grandes".
"Por eso, la reforma ha d'encarse con intelixencia democrática, con un modelu d'oficialidá democráticamente exemplar y qu'acabe con tantes décades d'un debate ensin sentíu", indicó Vallina.
La portavoz d'IX acabó la so intervención afirmando qu'esperen del Gobiernu "impulsu políticu", porque al so xuiciu'l Gobiernu y el grupu mayoritariu tienen que liderar esti procesu.
