UVIÉU, 26 Abr. (EUROPA PRESS) -
El Gobiernu del Principáu va introducir pela primer vez la enseñanza de llingua asturiana y gallego-asturianu pal alumnáu de trés a seis años --segundu ciclu d'Educación Infantil-- a partir del cursu 2025-2026. La implantación va suponer la creación d'unes cien places docentes nueves, polo que queda condicionada a l'aprobación del presupuestu autonómicu pa 2025.
La ufierta va ser obligatoria pa los centros pero voluntaria pa les families y va enmarcase nel área de aprendizaxe 'Comunicación y representación de la realidá,' una de los trés d'esta etapa formativa.
L'Executivu aprobó esti vienres un cambiu del plan normativu pa facer el cambiu del Decretu 56/2022, de 5 d'agostu, pol que se regula la ordenación y s'establez el currículu d'Infantil. La revisión del decretu resulta imprescindible pa introducir l'asturianu nesa etapa.
La incorporación de les llingües propies nel segundu ciclu d'Infantil nun supón el cambiu de los conteníos, polo que se garantiza que tol alumnáu reciba la mesma formación y algame iguales competencies. Los estudiantes que quieran van trabayar parte de los conteníos de 'Comunicación y representación de la realidá' n'asturianu y gallego-asturianu y el restu va facese en castellanu.
La ufierta nueva va implantase de forma simultánea nos trés cursos del segundu ciclu d'Infantil y va tener un mínimu de trés y un máximu de cuatro hores selmanales en tola etapa. Les sesiones van ser, preferiblemente, de 30 o 45 minutos. Los centros van tener que fixar, polo menos, una clase a la selmana nel primer cursu pal alumnáu de trés años.
La inversión anual prevista supera los cinco millones porque va suponer la creación d'unes cien places nueves de docentes a xornada completa, computando dos medies xornaes como una completa. Esa primer estimación calculóse en función de les places d'asturianu qu'existen agora. Les nueves surden, per un llau, de la medría d'horarios de media xornada a xornada completa y, per otru, de la creación d'otres adicionales que nun existíen primero.
La midida va suponer un beneficiu pa los centros educativos, porque la mayoría va cuntar con más docentes a xornada completa. Esa disponibilidá horaria mayor van poder destinala a tutoríes, xeres de xestión directiva o mesmo ellaborar proyectos de centru rellacionaos col asturianu, lo que va redundar na meyora de la calidá de la enseñanza, según aseguraron dende l'Executivu.
