UVIÉU, 28 Abr. (EUROPA PRESS) -
La Conseyería d'Educación analizó'l cambiu de la normativa que regula la formación permanente del profesoráu pa dar respuesta a la reconocencia de creitos de formación coles certificaciones del nivel competencial de llingua asturiana.
Asina, según indicaron fontes d'Educación a Europa Press, van ser oxetu de reconocencia toles certificaciones, tanto les yá emitíes l'añu pasáu como les que van salir de les convocatories d'anguaño 2021 y les posteriores, tanto n'asturianu como en gallego-asturianu.
Les mesmes fontes detallaron que'l motivu pol que nun se reconocieron primero los creitos de formación pa los docentes ye porque'l decretu 62/2001, de 28 de xunu, pol que se regulen les actuaciones sobre formación permanente del profesoráu y la convocatoria, reconocencia, certificación y rexistru de les actividaes correspondientes, nun recueye como formación les pruebes de certificación n'asturianu porque nesi momentu -nel añu 2001- nun taben previstes.
MÁS DE 600 INSCRITOS
La Conseyería d'Educación convocó anguaño'l nivel avanzáu C1 de certificación de Llingua Asturiana xunto al intermediu B2, que se convocó pela primer vez l'añu pasáu. Son un total de 600 places, 300 pa cada nivel.
Pa la convocatoria d'anguaño inscribiéronse 431 persones pal B2 y pal C1 199. L'añu pasáu, col primer exame del B2, abrióse una convocatoria de 500 places pa la que se rexistraron 800 solicitúes.
Los exámenes escritos de la convocatoria d'anguaño van celebrase el 9 d'ochobre de 2021 y los orales van empezar a partir del 15 d'ochobre. Les sedes tán por determinar. P'algamar la certificación va ser necesario llograr un cinco en toles actividaes de la prueba y una nota media igual o superior a un seis.
