"Queremos mostrar respetu a los muertos, los mancaos y les víctimes que causaron les acciones d'ETA", diz el testu
MADRID, 20 Abr. (EUROPA PRESS) -
La banda terrorista ETA publicó esti vienres, a quince díes de que se produza la so anunciada disolución definitiva, un comunicáu nel que reconoz "el dañu que causó na so trayectoria armada" y muestra "el so compromisu cola superación definitiva de les consecuencies del conflictu y cola non repetición". Diz que "oxalá nada d'eso asocediera" y apela a "la reconciliación".
Nel comunicáu, publicáu pol diariu GARA, ETA fala d'un "sufrimientu desmidíu" con "muertos, mancaos, torturaos, secuestraos o persones que se vieron obligaes a fuxir al estranxeru" y reconoz "la responsabilidá qu'adquirió nesi dolor", porque "nada d'eso tuvo que producise enxamás o nun tuvo d'allargase tanto nel tiempu".
"Somos conscientes de que nesti llargu periodu de llucha armada provoquemos muncho dolor, incluíos munchos daños que nun tienen solución. Queremos mostrar respetu a los muertos, los mancaos y les víctimes que causaron les acciones d'ETA, na midida que resultaron damnificados pol conflictu. Sentímoslo daveres", diz la banda terrorista, que'l 5 de mayu tien previstu un actu en Francia pa escenificar la disolución definitiva.
El comunicáu diz amás, que "polos erros o de decisiones errónees, ETA provocó tamién víctimes que nun teníen una participación directa nel conflictu" dientro y fuera del País Vascu.
PERDÓN A PERSONES "ENSIN RESPONSABILIDÁ DALGUNA"
"La nuestra actuación perxudicó a ciudadanos y ciudadanes ensin responsabilidá dalguna. Tamién provoquemos graves daños que nun tienen vuelta atrás. A estes persones y a los sos familiares pidímos-yos perdón. Estes palabres nun van solucionar lo asocedío, nin van apangar tanto dolor. Dicímoslo con respetu, ensin querer provocar de nuevu aflicción dalguna", reza l'escritu.
"Entendemos que munchos consideren y espresen que la nuestra actuación foi inaceptable ya inxusta, y respetámoslo, pues a naide puen forzalu a dicir lo que nun piensa o siente", añade de siguío.
ETA apunta que "pa otros munchos tamién foron totalmente inxustes, anque utilizaron el disfraz de la llei, les acciones de les fuercies del Estáu y de les fuercies autonomistes qu'actuaron conxuntamente, y tampoco esos ciudadanos y ciudadanes merecen ser humildaos".
"NAIDE PUE CAMUDAR EL PASÁU"
"De lo contrario, tendríamos qu'interpretar qu'existió un dañu xusto que merez aplausu. ETA, sicasí, tien otra posición: oxalá nada d'eso asocediera, oxalá la llibertá y la paz echaren raigaños en Euskal Herria va muncho tiempu", afirma agora la banda terrorista.
Nesta llinia, señala que "naide pue camudar el pasáu, pero una de les coses más perxudiciales que podría facese agora sería intentar esconder determinaos episodios".
"Reconozamos toos la responsabilidá contraida y el dañu causáu. Anque nun tenemos nin el mesmu puntu de vista nin los mesmos sentimientos, toos tendríamos que reconocer, con respetu, el sufrimientu de los demás. Eso ye lo que quier espresar ETA", apunta.
De cara al futuru, cita la "reconciliación" como "una de les xeres a facer" y que "na so midida ta produciéndose con honestidá ente la ciudadanía". "Ye un exerciciu necesario pa conocer la verdá de manera constructiva, cerrar feríes y construir garantíes pa que esi sufrimientu nun vuelva asoceder. Dando una solución democrática al conflictu políticu va poder construise la paz y llograr la llibertá", conclúi'l comunicáu.
