UVIÉU, 3 de Payares (EUROPA PRESS)
La fiscal superior d'Asturies, Esther Fernández García, alertó esti llunes de la proliferación de "profesionales de la denuncia" que carguen de trabayu a los fiscales y que xeneren un problema importante al cargar de trabayu'l so departamentu.
Trátase de grupos o persones, esplicó, que s'eleven en "defensores de la ciudadanía" y que lleguen a plantear a Fiscalía que realice hasta auditoríes a organismos públicos. Munches d'eses denuncies, esplicó, respuenden a intereses políticos. "Hai un abusu del denunciante, sobremanera n'época electoral", indicó.
Fernández García pronuncióse nesos términos nuna comparecencia na Xunta Xeneral del Principáu d'Asturies na que dio cuenta de la memoria del 2013 del so departamentu.
Ún de los datos qu'apaecen reflexaos ye que'l pasáu añu cursáronse 534 dilixencies d'investigación, de les que más del 67 por cientu archiváronse. "Hai grupos especializaos en denunciar", manifestó, esplicando que l'archivu vino motiváu en munches ocasiones por nun ser delitos o por ser abiertu yá'l procedimientu.
Trátase de grupos, manifestó, qu'amás busquen una repercusión mediática importante al denunciar, de forma que llogren l'oxetivu de castigar públicamente al denunciáu, anque nun exista base. Por eso, defendió la oficina de Comunicación de Fiscalía, como una ferramienta clave pa "restaurar honores" nesi tipu de casos. "Hai munches lluches cruzaes n'época electoral", manifestó.
FALTEN MEDIOS
Según la intervención de la fiscal xefe ésti ye namás ún de los problemes a los que s'enfrenta'l so departamentu, que tien una situación lloñe de ser la más apropiada pa ofrecer los servicios que demanda la sociedá.
N'Asturies hai 42 funcionarios pa 50 fiscales, lo que vien suponer qu'haya "más xefes qu'indios". La escasez tamién se centra nos medios materiales y na falta d'innovación tecnolóxica. Nel so departamentu nin siquier tienen un escáner que funcione, los ordenadores son "reliquies vieyes" y existe una "absurda" duplicación de trabayos a la que tien que facer frente el personal amenorgao.
Esplicó que los fiscales de guardia nin siquier tienen un espaciu específicu nel que trabayar nos xulgaos de guardia d'Uviéu o Avilés. En Llangréu nin siquier hai dependencies pa la guardia.
A estos problemes unió la saturación producida por "denuncies estravagantes" y la "falta de coordinación" qu'existe ente dependencies policiales, xulgaos y los fiscales, daqué que supón una importante "disfunción".
A la hora de poner un exemplu sobre esa problemática, Fernández Díaz refirióse a la "impunidá" qu'existe ente delincuentes que s'enfrenten a xuicios por delitos menores, de menos de 400 euros. El fechu de que nun s'atropen ye frutu d'esa falta de sintonía ente los distintos departamentos. La solución, dixo Fernández García, pasaría per que los policíes investiguen si existen más delitos nesi tiempu similares y, en atropándolos, unvialos al xulgáu.
