MADRID, 20 d'Abril (EUROPA PRESS)
Les dilixencies d'investigación enmarcaes na 'Operación Lezo' contra la corrupción en filiales de la Canal d'Isabel II n'Iberoamérica causaron una rebelión mayoritaria nel senu de la Fiscalía Anticorrupción el pasáu martes, por cuenta de la orde dada pol fiscal xefe del departamentu, Manuel Moix, contraria al criteriu de los dos fiscales ascritos al casu sobre'l rexistru na casa d'unu de los imputaos.
Fontes de la fiscalía Anticorrupción confirmaron a Europa Press que nun se trataba en nengún casu del rexistru na casa del expresidente de la Comunidá de Madrid Ignacio González, que resultó deteníu, nin nel de nengún de los principales imputaos. Afectaba a otru de los investigaos por fechos bien anteriores a la llegada d'aquéllos a la Canal d'Isabel II.
Por esta razón, Moix ordenó "desvincular cronolóxicamente" esti rexistru y el bloque de fechos relativu a esta dilixencia concreta, una decisión a la que los fiscales del casu, Carmen García Cerdá y Carlos Yáñez opunxéronse invocando l'artículu 27 del Estatutu Orgánicu del Ministeriu Fiscal, daqué que ta previsto na mesma norma pero que ye bien poco avezao qu'asoceda, según les fontes consultaes.
En dichu artículu dizse qu'aquel fiscal que reciba una orde "que considere contraria a les lleis o que, por cualquier otru motivu estima improcedente" va facer saber al so fiscal xefe "per mediu d'informe razonáu" y que, si ésti "nun considera satisfactories les razones averaes, va plantegar la cuestión a la Xunta de fiscalía".
Eso ye lo qu'asocedió'l pasáu martes na sede de la Fiscalía Anticorrupción, según les fontes consultaes, y n'oyendo a los sos compañeros, la práctica totalidá de la ventena de fiscales qu'integren esti departamentu -toos menos unu-- apoyaron a los compañeros de la Operación Lezo y manifestáronse contrarios a la orde de retrasar el citáu rexistru.
