UVIÉU, 1 Abr. (EUROPA PRESS) -
El repatu nuevu de les cuotes adicionales provenientes de los intercambios ente especies con otros países de la Unión Europea (swaps) va xubir la capacidá pesquera de la xarda un 71% en comparanza col total asignáu en 2019. D'esta manera, la flota asturiana va disponer de 2.083.339 quilos, una de les cantidaes mayores dende 2014, según informó'l Principáu en nota de prensa.
La Secretaría Xeneral de Pesca del Ministeriu d'Agricultura, Pesca y Alimentación treslladó a les comunidaes del Cantábricu Noroeste un borrador de la propuesta de resolución que va tar abierta a alegaciones hasta'l 7 d'abril. El documentu recueye los repartos de los swaps tomando en consideración criterios de calter socioeconómicu y de dependencia de la flota, como reivindicaba'l Principáu.
El Gobiernu d'España llogró de los intercambios ente especies con otros países europeos 1.700.000 quilos. El 60% d'esa cantidá ye'l que se va repartir teniendo en cuenta criterios como'l númberu de buques, según la so eslora y capacidá de propulsión, lo qu'atiende a les continues demandes del sector pesqueru asturianu.
La flota rexonal tenía asignao pa la campaña d'anguaño 1.796.190 quilos de xarda, a los que s'añaden 287.149 más, una vez s'oficialice'l repartu de los swaps. Colos criterios de repartu d'años anteriores la flota asturiana namás llograra 92.000 quilos de los 1.700.000 xeneraos polos intercambios con otros países.
