UVIÉU, 4 May. (EUROPA PRESS) -
El diputáu de Foru Asturies, Pedro Leal, afirmó que'l so partíu nun va participar en "nenguna manifestación convocada pola oficialidá del asturianu". Nesi sentíu, calificó de "inoportuno" plantear acciones "como esta" nel momentu actual "porque perxudiquen la protección del nuestru patrimoniu llingüísticu".
Al traviés de nota de prensa, Leal posicionóse sobre la participación del so partíu na tradicional manifestación del Día de les Lletres Asturianes qu'entama la Xunta pola Defensa de la Llingua esti vienres a les 19.30 hores nel Teatru Campoamor.
Les palabres de Leal surden depués de que l'asociación Iniciativa pol Asturiana anunciara que diben tar presentes na so pancarta, polo que'l diputáu quixo esclariar que Foru "nun va tar nin va asistir a nenguna manifestación convocada pola oficialidá".
Asina, Leal aseguró que "ye inoportunu plantear acciones como esta nel momentu actual porque perxudiquen la protección del nuestru patrimoniu llingüísticu", y añadió que "el futuru del asturianu tien de xirar sobre un modelu nel que naide tea obligáu a usalo o aprendelo, nin nel que tampoco nenguna persona pueda vese impidida a espresase nel mesmu".
"L'asturianu nun pue convertise nuna barrera, torga o frontera pa dixebrar a los asturianos, nin ye aceptable un modelu d'oficialidá como'l de Cataluña, País Vascu o Galicia, porque les característiques sociollingüístiques d'Asturies son distintes", señaló.
Nesi sentíu, indicó que'l programa de Foru ye "públicu, conocíu, diáfanu, inenquívocu y incuestionable na protección y defensa del patrimoniu llingüísticu de los asturianos porque nun actuamos como reacción a la esquierda radical nin a golpe d'ocurrencies nin improvisaciones."
