UVIÉU, 22 Jun. (EUROPA PRESS) -
La Comisión Executiva Autonómica de la Federación Socialista Asturiana (FSA-PSOE) alcordó esti xueves, por unanimidá, proponer a María Fernández pa ser nomada senadora por Asturies, por designación autonómica de la Xunta Xeneral del Principáu.
La exalcaldesa de Llangréu foi la escoyida na xunta estraordinaria celebrada esta tarde na sede de la FSA-PSOE, pa cubrir la vacante de l'acta na Cámara Alta que correspondía a Luisa Carcedo, que debió arrenunciar al ser nomada Alta Comisionada na llucha contra la probeza infantil.
La propuesta de nomamientu de María Fernández pola Comisión Executiva Autonómica va sometese a aprobación nel Comité Autonómicu que se va celebrar el llunes próximu, según informen dende la FSA en nota de prensa.
María Fernández, que yá ocupó'l númberu dos en candidatura de la FSA-PSOE al Senáu nes elecciones xenerales pasaes, ye llicenciada en Derechu pola Universidá d'Uviéu. Foi alcaldesa del Conceyu de Llangréu dende 2012 hasta 2015 y, na actualidá, ye portavoz del grupu municipal socialista del Conceyu de Llangréu y secretaria de Cohesión y Derechos Sociales de la Comisión Executiva Autonómica. Tamién foi secretaria xeneral de l'Agrupación Socialista de Llangréu dende 2012 hasta 2017 y representante de la Comisión Federal de Llistes y del Comité Federal del PSOE dende 2012 hasta 2017.
