UVIÉU, 13 Dic. (EUROPA PRESS) -
El dibuxante Ruma Barbero presentó esti xueves el so cómic sobre la vida del guerrilleru asturianu Gaspar García Laviana. La edicición ye una iniciativa del Comité de Solidaridá con América Llatina (Cosal) n'homenaxe al 40 aniversariu de la so muerte.
Según esplicó l'autor nuna rueda de prensa n'Uviéu, la idea del títulu surdió d'unos versos del cantautor nicaragüense Luis Mejía Godoy. Al traviés de la figura de Laviana quixo esplicar "l'internacionalismu". El proyectu enmárcase dientro d'esta temática y del cómic social y políticu al que Barbero lleva muncho tiempu dedicándose, según esplicó.
El llibru 'Gaspar Vive' foi la base pa estructurar la so publicación, amás d'entrevistes a compañeros del guerrilleru en Nicaragua. A lo llargo d'añu y mediu el dibuxante tuvo documentándose pa "recoyer en 28 páxines tola información sobre la vida de Laviana" del qu'espera facer una obra más estensa.
Nel actu de presentación d'esti xueves asistieron la conceyala d'Atención a les Persones y Igualdá, Marisa Ponga, el miembru de Soldepaz Pachakuti Javier Arjona y la representante de Cosal Ana Rodríguez, qu'apuntó que ye "un homenaxe a la figura de Gaspar y a la de toles persones que lluchen contra la inxusticia social".
Barbero llogró dellos premios como 'El Llapiceru' o'l premiu 'Alfonso Iglesias' pol cómic 'Manzajú'. Tamién foi premiáu al meyor llibro n'asturianu 2012 pola novela gráfica 'La Chelita'. Amás, destaca pol so llabor como diseñador gráficu realizando carátules de discos asturianos y cartelos de conciertos o festivales.
Nesta ocasión, el Conceyu d'Uviéu collaboró mercando 100 exemplares d'esta publicación que se van distribuyir na rede de biblioteques y nes entidaes que muestren el so interés.
