MADRID, 26 Feb. (EUROPA PRESS) -
El Gobiernu español y la Generalitat catalana alcordaron que la mesa de diálogu sobre'l "conflictu" que definen como "de naturaleza política" en Cataluña aconceye una vez al mes y busque posibles consensos que tienen que formulase "nel marcu de la seguridá xurídica", ensin nenguna referencia a la Constitución.
Asina lo contempla un comunicáu conxuntu que les dos delegaciones pactaron al final d'una xunta de trés hores nel Palaciu de la Moncloa que supera les espectatives baxes coles qu'encaraben esti alcuentru presidíu pol xefe del Executivu, Pedro Sánchez, y el president de la Generalitat, Quim Torra.
Dende la cúpula del PSOE reconocíen esti miércoles la importancia de qu'esta xunta de la mesa fuera bien pa que se facilitara l'aprobación el xueves nel Congresu de la sienda d'estabilidá presupuestaria nueva, alcuerdu del Gobiernu que se va publicar al empar de la llende de gastu, conocíu comúnmente como 'techu de gastu', y que va enantes de la tramitación de los Presupuestos Xenerales del Estáu.
Pa sacar alantre la votación y someter la sienda a una votación nueva nel Senáu, el Gobiernu de Pedro Sánchez tien yá, amás de PSOE y Unidas Podemos, los votos de PNV, Más País, Compromís, Nueva Canarias y Coalición Canaria, lo que suma 166 votos.
Énte'l refugu de PP, Vox y Ciudadanos, contrarios a establecer un marxe mayor de déficit como ufre l'Executivu, el Gobiernu precisa la complicidá de formaciones independentistes, como Esquerra Republicana y Junts per Catalunya, pa llevalos, polo menos a l'astención. Tanto ERC como Junts retardaron la so decisión hasta depués de la celebración de la xunta constitutiva de la mesa de diálogu.
