UVIÉU, 30 d'Ochobre (EUROPA PRESS)
El presidente del Fondu pa la Protección de los Animales Salvaxes (Fapas), Roberto Hartasánchez, aseguró esti xueves qu'aceptó la condena a un añu y mediu de cárcel por homicidiu imprudente "pa salvar los puestos de trabayu de l'asociación".
Hartasánchez asumió'l pasáu 17 d'ochobre esta condena pol homicidiu imprudente d'un trabayador de Fapas de 26 años, que morrió en saliéndose de la vía'l dumper que conducía. La Fiscalía solicitara pa él trés años de prisión, pero a lo último les partes llegaron a un acuerdu previu a la celebración del xuiciu.
Nuna rueda prensa, el presidente de Fapas denunció "incongruencies" na acusación del Ministeriu Públicu, qu'informó a los medios de comunicación de la imputación d'Hartasánchez el día previu a la vista oral. Na so defensa, el representante de l'asociación desmintió que Fapas nun tenga los seguros obligatorios, y aseguró que'l mozu fináu sí tenía la formación necesaria pal desempeñu del so trabayu, al contrario de lo que defendía la Fiscalía.
Según Hartasánchez y el so abogáu, Sergio Noval, el presidente de Fapas asumió l'añu y mediu de cárcel por homicidiu imprudente y falta de seguridá de los trabayadores porque l'asociación "nun pue permitise prollongar el procesu xudicial mientres trés años --mientres los que los bienes de Fapas taríen embargaos-- pa demostrar la so inocencia". Insistió n'asegurar que "nun ye culpable" de los fechos, magar qu'aceptara la condena.
"Ye insólito, acúsenmos de que'l fináu nun tenía formación, cuando realizara un ciclu formativu de 2.000 hores rellacionáu col so trabayu", criticó. Insistió amás en que "nun entiende" los motivos que llevaron a la Fiscalía pa realizar estes afirmaciones y el so abogáu dixo que se siente "maltratáu" pola acusación del Ministeriu Públicu.
Hartasánchez decidió comparecer ante los medios pola "preocupación" qu'estes acusaciones provocaron ente los socios de l'asociación. Según él, nel testu de la Fiscalía, Fapas apaez como una asociación "que nun se correspuende cola realidá, paez que somos un grupu d'indixentes sin conocimientu".
Sobre la falta de seguros, tanto Roberto Hartasánchez como'l so abogáu negaron esti estremu, asegurando que disponíen de los obligatorios. Faltaben los voluntarios, daqué que se solucionó al convertise Fapas nuna entidá autoasegurada que pagó la indemnización por fallecimientu a la familia, según Noval.
