UVIÉU, 14 Ene. (EUROPA PRESS) -
El secretariu d'estratexa política d'IX, Alejandro Suárez, anunció esti vienres que va plantear "una propuesta de desbloquéu" respondiendo a les 12 propuestes de Foru pa la reforma del estatutu. "Vamos contesta-y a los doce, una por una, y vamos ver el nivel d'alcuerdu que pue haber, que nós ciframos alredor d'un 75% de les propuestes que yá nos unvió Foru".
"Por eso, creemos qu'esi ye un planteamientu bonu pa la dirección de Foru, que sepa qu'IX ta dispuesta a aceptar trés cuartes partes de toles propuestes que nos punxeron enriba la mesa, dende'l mediu rural, una llei de l'Asturies Vaciada, demografía, infraestructures, etc. Mesmo propuestes de fiscalidá diferenciada que yá aceptamos nos últimos presupuestos d'ayudes a la natalidá", señaló Suárez.
Izquierda Xunida caltién la voluntá pa desbloquiar la negociación pa llograr la oficialidá del asturianu, depués de la segunda xunta que caltuvieron los grupos favorables a la reforma estatutaria.
La estorbisa ta nel impuestu de sucesiones, dalgo que, destacó'l dirixente d'IX, "nun pue tomar por sorpresa a naide" porque la formación llegó ensin nengún tipu d'esixencia, tamién, alertó de qu'existíen puntos que nun podíen vinculase a una reforma col oxetivu de garantizar derechos.
"Siempre fomos claros: la fiscalidá ye parte del ADN d'IX, forma parte del nuestru núcleu más importante programáticu". Pa Suárez, una negociación precisa flexibilidá por toles partes pa intentar avanzar. "Hai que recordar qu'IX nun planteó nengún condicionante nesta negociación: nun planteamos, por exemplu, elementos fundamentales pa nós, como ye la reforma de la Llei electoral o como ye'l blindaxe de los derechos sociales, nun planteamos nada. Tamos viniendo a esta reforma ensin condicionantes; entá asina, los condicionantes de Foru Asturies vamos analizalos y vamos face-yos una propuesta de desbloquéu de la situación. Nun ye bono enriscase y nun ye bono bloquiar, porque non toles tos propuestes sían aceptaes".
Alejandro Suárez insistió en que ye necesario una flexibilidá de toles partes. "Si dos persones o dos organizaciones negocien y una ta dispuesta a aceptar trés cuartes partes de la otra propón, yo creo que se ta siendo flexible. Yo si fuera un negociador de Foru diría que ye un éxitu negociador: oi, fui con 100 propuestes y aceptáronme 75. Hai que ser flexibles, hai que buscar puntos d'alcuentru, hai que pactar, hai que desbloquiar. La política asturiana nun pue ser una política de bloquéu y ehí ta IX".
