UVIÉU, 4 May. (EUROPA PRESS) -
El presidente del Gobiernu asturianu, el socialista Javier Fernández, refirióse esti vienres, nel plenu de la Xunta Xeneral del Principáu d'Asturies y a entrugues de Ciudadanos, que la oficialidá de la llingua asturiana nun ye una cuestión que pueda aprobase a lo roncha --"de tapadillo" foron les palabres lliterales--. Nesi sentíu, esplicó que nun valdría que'l Gobiernu asturianu, del PSOE, impulsara güei esa oficialidá cuando nun taba nel so programa electoral.
Teniendo en cuenta'l cambiu d'opinión que se produció nel PSOE asturianu, cola dirección del actual secretariu xeneral, Adrián Barbón, qu'aprobó unu resolución apocayá na que sí apuesta pola oficialidá, Javier Fernández dixo que van ser los asturianos los que decidan sobre esti asuntu nes elecciones autonómiques, cuando los partíos planteen esti asuntu nos sos programes.
El portavoz de Ciudadanos, Nicanor García, dixera enantes que la falta d'alcuerdu nel PSOE y la non profundización del Gobiernu nel desarrollu de la Llei d'Usu y Promoción del asturianu afalara precisamente qu'haya grupos que, con "oportunismu", falen agora en qu'hai qu'aprobar yá la oficialidá.
García indicó que la norma mentada yá ufierta un marxe importante pa los partidarios del usu de la llingua asturiana, que mesmo contempla que se valore nos concursos públicos o'l so usu na alministración, ensin el costu que supondría la oficialidá.
Fernández refugó l'argumentu de que s'avivaron les reivindicaciones de la oficialidá por culpa de la non profundización na llei. El dirixente socialista esplicó que se trata d'una reivindicación de determinaos colectivos dende hai muncho tiempu.
"Yo creo que la cuestión clave ye qué quieren facer los homes y muyeres d'Asturies cola so llingua; que siga asina o que sía cooficial; y eso van decidilo nes elecciones próximes", dixo Fernández, qu'esplicó qu'esta ye una cuestión que tien "trescendencia pa la sociedá asturiana". El presidente asturianu yá se refirió n'otres ocasiones na Xunta a la so posición personal nesta materia, contraria a la oficialidá.
