UVIÉU, 22 Oct. (EUROPA PRESS) -
El presidente del Gobiernu d'Asturies, el socialista Javier Fernández, va encarar esta selmana na Xunta Xeneral del Debate d'Orientación Política Xeneral correspondiente al añu llexislativu 2018-2019, conocíu popularmente como 'debate sobre l'estáu de la rexón'.
Va ser l'últimu debate que tenga como protagonista a Fernández, una vez que yá se confirmó que'l dirixente asturianu nun va optar a repitir nel cargu.
El debate inclúyese nes midíes d'orientación y control que'l parllamentu rexonal fai del Executivu. Realízase al empiezu de cada añu llexislativu. Val pa que, depués de que Javier Fernández faiga balance y prospección, los grupos parllamentarios puedan confrontar con él y formular propuestes que someten a votación pa dirixir al Executivu nel so llabor de dirección de la política rexonal.
D'esta forma, el Debate implica trés xornaes de sesión plenaria a celebrar los díes 23, 24 y 26 d'esti mes d'ochobre, según la convocatoria.
Na primer xornada, el martes 23 d'ochobre, Javier Fernández va dirixise a la Cámara a partir de les 11.00 hores nun discursu nel que van tar presentes cuestiones d'actualidá como la crisis desencadenada pol anunciu de pieslle d'Alcoa, les infraestructures pendientes, la falta de conexones aérees o la necesidá d'aprobar unos presupuestos rexonales pa 2019. Fernández gobierna n'Asturies con 14 de 45 diputaos. El discursu suel durar dalgo más d'una hora.
Al otru día, miércoles 24 d'ochobre, la sesión va principiar a les 9.00 hores, con interpelaciones al presidente de caún de los portavoces de los cinco grupos de la oposición. Tamién el PSOE, partíu al que pertenez Fernández, va tener la so vez pa dirixise al presidente y ésti pa retrucar.
A partir d'ehí, los grupos parllamentarios van tener que rexistrar les sos propuestes de resolución pa dirixir al Gobiernu, que se van defender y van votase na última sesión, la del vienres día 26 d'ochobre. Esi día'l plenu va empezar tamién a les 9.00 hores.
