UVIÉU, 21 Nov. (EUROPA PRESS) -
El presidente del Principáu d'Asturies, el socialista Javier Fernández, mostró'l so refugu "esplícitu" a la resolución aprobada nel Congresu de los Diputaos --apoyada pol PSOE-- relativa al amenorgamientu d'emisiones de CO2 nel marcu de les directives europees del denomináu "paquete d'iviernu". "Si eso se lleva alantre, tolos grupos térmicos de carbón taríen condenaos al zarru", alvirtió. Sicasí, refugó que la resolución mentada suponga "el fin del carbón nacional".
Mentes el so discursu nun almuerzu informativu, recordó que la estracción de carbón nacional "tien güei un horizonte más llindáu entá nel tiempu que'l de les térmiques". El Principáu, dixo, trata de treslladar la flexibilización del plazu --que remata n'avientu de 2018-- a la Unión Europea.
Faciendo alusión al zarru anunciáu por Iberdrola de la central térmica de Lada, señaló que la clausura "anticipada" de les térmiques supondría una reconversión industrial nueva p'Asturies que nesti casu afectaría al polu enerxéticu formáu poles mesmes centrales, los empleos directos y indirectos, la loxística y l'impactu sobre'l movimientu portuariu.
"Por eso convién tar sollerte y pronunciase con nitidez y rotundidá: adelantrar el zarru ye un erru y perxudicaría gravemente la nuestra actividá industrial", señaló.
La descarbonización de la economía, esplicó, equival a proclamar el fin de la combustión, lo que supón "ún de los mayores desafíos de los próximos años". Si se fai mal, alvirtió, pue provocase amás un alza del preciu de la eletricidá, tanto pa los consumidores domésticos como pa los industriales. "¿Fai falta resaltar qu'Asturies concentra industries electrointensives?", preguntóse.
