UVIÉU, 25 May. (EUROPA PRESS) -
La Conseyería d'Educación publicó esti llunes una resolución onde se ordena la continuación de l'actividá lectiva presencial el día 4 de xunu de 2020 de manera voluntaria parlos alumnos del segundu cursu de Bachilleratu pa clases preparatories d'EBAU.
Per otru llau, tamién van poder incorporase los alumnos del módulu integráu de proyectu y FCT d'enseñances profesionales y del cuartu cursu d'Enseñanza Secundaria Obligatoria pa refuerciu educativu.
Coles mesmes, va incorporase'l personal docente que convoquen les direcciones de los centros pa la realización de trabayos y trámites rellacionaos col final del tercer trimestre. Les midíes organizatives que s'adopten sobre atención presencial del profesoráu va combinase cola atención a distancia y nun van poder suponer una medría del horariu del profesoráu.
L'alumnáu que s'incorpore voluntariamente a les clases de refuerciu educativu nel cuartu cursu d'enseñanza secundaria obligatoria, nel supuestu de que se tratara d'alumnáu con derechu a tresporte, va poder participar na convocatoria abierta d'ayudes individualizaes de tresporte escolar.
El personal docente del Principáu d'Asturies que pueda considerase como persona especialmente sensible al riesgu del SARS-CoV-2 va tener qu'unviar la solicitú de valoración de riesgu por motivos de salú al Serviciu de Prevención de Riesgos Llaborales del Principáu d'Asturies.
MIDÍES SANITARIES
Amás, Educación aprobó delles midíes organizativas, d'hixene y llimpieza, y d'adecuación de los centros educativos pa protexer la salú y la seguridá de les persones y la prevención de riesgos llaborales. Coles mesmes, la Conseyería va publicar una Guía de Midíes de Prevención ya Hixene frente al COVID-19 pa los centros educativos.
L'Alministración autonómica estableció que van ser los equipos directivos los que van velar pol cumplimientu de les midíes mentaes ensin perxuiciu de les competencies y responsabilidaes que tengan atribuyíos otros órganos de la Conseyería.
