UVIÉU, 27 Oct. (EUROPA PRESS) -
El presidente de l'Academia de la Llingua Asturiana (ALLA), Xosé Antón González Riaño, afirmó esti martes que na primer sesión del Debate d'Orientación Política se punxeron les bases "p'avanzar ensin rodeos haza la oficialidá".
Nun apunte en Twitter recoyíu por Europa Press, Riaño posicionóse sobre les palabres del presidente Adrián Barbon na so intervención inicial nel debate d'orientación política na Xunta Xeneral.
Ellí el presidente dixo qu'Asturies ha de tar "arguyosa de la so cultura" y refirióse a episodios polémicos nel Parllamentu, con enfrentamientos pol usu del asturianu y el gallego-asturianu, llingua qu'utilizo pela primer vez.
Amás, fixo un llamamientu a ignorar les "provocaciones" de dellos sectores que tán contra la oficialidá y dixo que nesta llexislatura existe la oportunidá de "buscar un consensu tresversal" sobre'l modelu d'oficialidá que más p'alantre se pueda treslladar al Estatutu d'Autonomía.
El presidente de l'ALLA retuitió un videu cola intervención n'asturianu y gallego-asturianu de Barbón dende la cuenta de la FSA y escribió que "güei na Xunta Xeneral se punxeron les bases p'avanzar ensin rodeos haza la oficialidá". "Agora ye'l momentu d'actuar con xenerosidá pa con Asturies, la so llingua y cultura", sentenció
