Actualizado 28/06/2017 17:42

L'apoyu mayoritariu a la oficialidá del asturianu caltiénse anque baxa siete puntos (53%), según l'Euskobarómetru

Pola derecha, Llera, Riaño y Cueva.
Europa Press

UVIÉU, 28 de Xunu (EUROPA PRESS)

Los asturianos siguen apoyando mayoritariamente la oficialidá del asturianu anque'l porcentaxe de los que manifiesten esta postura baxó d'un 60% a un 53% dende l'añu 2002. Amás, aumentaron les opiniones favorables al so usu vehicular na enseñanza y triplicóse'l númberu de falantes alfabetizaos.

Son dalgunes de les conclusiones del avance de la tercer encuesta sociollingüística realizada pol equipu del Euskobarómetru, dirixíu pol profesor de la Universidá del País Vascu Francisco Llera Ramos. L'investigador, qu'entiende que se dio una "recuperación con clarescuros", ofreció esti miércoles una rueda de prensa para presentar los datos, acompañáu pol presidente de l'Academia de la Llingua, Xosé Antón González Riaño, y pol secretariu de la Institución, Xosé Ramón Iglesias Cueva.

Los presentaos esti miércoles son los datos provisionales de la tercer encuesta (la primera tuvo llugar en 1991 y la segunda nel 2002). Los definitivos, más afondaos van dar a conocese mientres la seronda.

L'estudiu, realizáu sobre una amuesa de 600 persones, destaca qu'un 53% (el 40% tán totalmente d'acuerdu, y el 13% parcialmente) de la opinión pública autonómica sigue apoyando la demanda de la oficialidá del asturianu, magar rexístrase una gastadura d'un 7%. Los contrarios algamen un 25% y los indiferentes son a un 20%. D'acordies con Llera, esi descensu del 7% débese al cansanciu "pola sensación de fracasu", al contemplar que nun se consiguió esa oficialidá.

Nesti sen, un 57% de los asturianos sigue apostando pola normalización d'un asturianu estándar o común, magar un 18% d'ellos pide que se respeten les variantes y otru 12% refuga "l'artificialidá". Sicasí, ascendió 10 puntos la opinión contraria a la normalización, pa "dexar les fales llocales" (25%).

Pasóse, según estes primeres conclusiones d'un 12% de falantes "escasamente alfabetizados" a un 69% de falantes, y un 38% d'ellos alfabetizaos.

Nesti sen, l'estudiu recueye qu'un 43% de los qu'estudiaron asturianu creen que la variante escolarizada tien poco o nada que ver cola que se fala, frente al 46% qu'entiende que tien daqué que ver o que ye bien paecíu. Preguntáu sobre esti puntu, González Riaño considera que l'ausencia d'un modelu d'escolarización desarrolláu trai esa percepción pa una parte de la población.

LLINGUA VEHICULAR

Otru de los puntos destacáu ye'l refuerzu de la demanda del asturianu como llingua vehicular na enseñanza, precisamente cuando'l Gobiernu asturianu va llanzar un plan pilotu al respecto en dellos centros educativos el próximu cursu. Un 52% (cuatro puntos más que nel 2002) considera que l'asturianu tendría que ser llingua vehicular y demanda una enseñanza billingüe en mayor o menor midida, frente a los qu'apoyen que seya toa en castellán (un 43%, cuatro puntos menos).

Nesti sen, el sistema educativu, un 70% ta d'acuerdu en que l'asturianu figure como una asignatura optativa, mientres qu'un 21% considera que tendría de ser una asignatura más, y el 8% cree que nun tendría d'estudiase.

Sobre les polítiques llingüístiques desarrollaes pol Gobiernu asturianu, les posiciones más crítiques moderáronse, anque un 64% sigue pensando que les Instituciones nun faen nada (14%), faen poco (27%) o que podríen faer más (23%) pol caltenimientu y la promoción de la 'llingua'. Son un 12% los que se conformen cola situación actual.

MEDIOS DE COMUNICACIÓN

La encuesta muestra una actitú crítica sobre'l tratamientu del asturianu na RTPA. Un 58% cree que la temática de los programes en llingua tendría qu'ampliase. Un 43% afirma siguir la programación n'asturianu. Baxó un 11% el númberu d'entrevistaos que creen que los medios impresos tendríen de ser dafechu n'asturianu (45%), mientres qu'un un 63% (aumenta un 12%) cree que tendría d'haber dalguna presencia de la 'llingua', y un 15% cree tendríen de ser la mayoría.

Sobre les demandes y actitúes llingüístiques, un 49% de los asturianos aspira a un horizonte billingüe onde asturianu y castellán convivan por igual, y un 28% cuenta que tendría d'haber más presencia del castellán y un 10% más del asturianu.

Llera destacó la polarización social que se percibe, al aumentar coles mesmes el porcentaxe d'asturianos que consideren la 'llingua' como la llingua d'Asturies (36%) y los que consideren el castellán (29%), en perxuiciu de los que consideren dambes (34%, un 14% menos).

El profesor destaca la "moderada recuperación del optimismu" sobro'l futuru inciertu del asturianu, puesto qu'un 32% mostróse optimista, y un 20% cree que va sobrevivir con dificultaes. Frente a ellos, hai un 20% d'asturianos que cree que va desapaecer amodo, y un 5% que piensa que va facelo "inevitablemente".

Riaño consideró los datos del estudiu como una base pa desarrollar la política llingüística n'Asturies mientres los próximos diez años (hasta la próxima encuesta sociollingüística). Mostró nesti sen la voluntá de l'Academia pa trabayar col Gobiernu asturianu en satisfacer la demanda pública" que recueye la encuesta y "correxir los puntos débiles".

Asturianu ofrecido por