UVIÉU, 9 Oct. (EUROPA PRESS) -
L'Arzobispáu d'Uviéu emitió esti miércoles un comunicáu con motivu del enzarru de trés trabayadores de la empresa Vesuvius na Catedral d'Uviéu, en señal de protesta pol espediente de regulación d'empléu que-yos afecta.
"L'Arzobispáu quier facer llegar, de primeres, el so apoyu a los empleaos y les sos families", esplica nel comunicáu mentáu, nel qu'añade que los trabayadores intenten dar a conocer la so "dramática situación" cola midida. El Cabildu atendiólos y procuró facilitar la so estancia nel interior de la Catedral. Los trabayadores enzarraos comprometiéronse a respetar el cultu y l'actividá diaria del templu.
Recordaron amás dende l'Arzobispáu que l'Arzobispu d'Uviéu, Jesús Sanz Montes, manifestó en delles ocasiones la so solidaridá con ellos y, sobremanera, na homilía del día de Cuadonga: "Vaiga la mio cercanía hacia toes eses families y la mio oración pa que quien pue mediar y remediar atine a negociar con eficacia".
"L'Arzobispáu confía en que los organismos a los que correspuende encarar esti grave problema articulen les midíes afayadices pa que se resuelva de la meyor manera posible", conclúi'l comunicáu.
