9 de abril de 2020
 
Actualizado 30/04/2018 11:01:19 +00:00 CET

L'asturianu protagoniza una selmana temática nos actos de la Capital Europea de la Cultura 2018

Xera, grupo musical folk asturiano
EUROPA PRESS/XERA - Archivo

UVIÉU, 30 Abr. (EUROPA PRESS) -

La llingua asturiana va protagonizar una selmana temática nos actos oficiales de la capitalidá europea de la cultura, celebrada na ciudá de Leeuwarden. Esta localidá de los Países Baxos va contar con ambientación mitolóxica, actividaes infantiles, conciertos, talleres d'indumentaria tradicional y un puestu turísticu informativu, too eso col asturianu como llingua vehicular.

La selmana asturiana foi posible gracies a la Fundación Afûk, responsable del proyeutu de les llingües nos actos de la capitalidá europea, y ta coordinada por Iria Rodríguez y Carlos Díaz, del grupu musical Xera, que lleven yá dos años viviendo nos Países Baxos y cuasi ocho desendolcando rellaciones culturales con organizaciones en defensa de la llingua frisia.

Según señalen al traviés de nota de prensa, la llingua asturiana ta considerada nos Países Baxos como "un importante referente a protexer dada la so relevancia histórica y la gran cantidá de producción cultural qu'ufierta, mui perriba d'otres llingües europees yá oficiales".

Asina, la llingua asturiana va contar con una selmana propia igual que'l vascu, el gallegu, el corsu, el friulianu, el maltés, el serbiu y el gaélicu, entre otres. Na organización participa l'asociación Iniciativa pol Asturianu, la Fundación Belenos, Reciella-Families pol Asturianu, musicasturiana.com, la Oficina de Turismu del Principáu d'Asturies y el grupu Xera, que va dar tres conciertos, y la Banda de Gaites La Raitana, encargada del taller d'indumentaria.