UVIÉU, 9 May. (EUROPA PRESS) -
Les subvenciones del Ministeriu de Cultura pa la promoción de la llectura y les lletres españoles y les destinaes a entidaes ensin ánimu d'arrequecimientu que promuevan y afiten la industria editorial van permitir, pela primer vez, proyectos qu'utilicen l'asturianu.
Les primeres busquen promover actividaes y programes de difusión del llibru, la llectura y les lletres españoles pa promocionar la cultura española, mentes que les segundes busquen afalar los alcuentros de profesionales, la realización d'estudios y investigaciones y, en xeneral, toles iniciatives p'ameyorar el funcionamientu de la industria editorial.
Les resoluciones de les ayudes recuerden que, según lo qu'establez la Constitución nel so artículu 3.2 y 3.3, van poder acceder a esta ayuda "tanto los proyectos a desenvolver en castellanu, como los proyectos en cualesquier de les llingües oficiales d'España, amás d'aquelles con reconocimientu xurídicu nos estatutos d'autonomía de les Comunidaes Autónomes".
Estes ayudes súmense a les subvenciones pa la creación lliteraria, onde pela primer vez puen presentase obres n'asturianu o aragonés. El ministru de Cultura, Ernest Urtasun, yá anunciara esta midida en febreru n'Avilés, mentes la sectorial de Cultura celebrada nel Centru Niemeyer.
Ellí, acompañáu de la conseyera de Cultura, Política Llingüística y Deporte del Principáu, Vanessa Gutiérrez, Urtasun anunció que la lliteratura n'asturianu, magar nun ser oficial, diba poder optar a les ayudes a la creación lliteraria y a les ayudes próximes a la edición, dalgo que nun pasaba hasta la fecha --con too, col ministru Iceta permitióse que l'asturianu pudiera optar a les ayudes a la traducción ente llingües del Estáu--.