Podemos y IX sostienen que ye tiempu "de futuru pal asturianu" y van siguir "sumando fuercies hasta algamalo".
Mercedes Fernández (PP) asegura que recibe "amenaces y insultos" anónimos de los que "se supón que defenden una idea grande".
UVIÉU, 23 Nov. (EUROPA PRESS) -
L'Estatutu d'Autonomía d'Asturies nun se va reformar na llexislatura presente pa incorporar la oficialidá del asturianu y del gallego-asturianu, como pretendíen Podemos y IX. Los grupos parllamentarios Socialista, Popular, Foru y Ciudadanos sumaron esti vienres una mayoría de 30 escaños pa refugar tomar en consideración la proposición nel plenu de la Xunta Xeneral.
Depués d'una parada de media hora pa participar na concentración pola conmemoración del Día Internacional contra la Violencia sobre les Muyeres, la sesión retomóse col debate sobre la la reforma estatutaria pa incorporar la oficialidá.
Un debate especialmente intensu y que s'allargó más de lo esperao, cuantimás pol usu escesivu de los tiempos en delles intervenciones. Ello ye que la portavoz y presidenta del PP, Mercedes Fernández, triplicó'l so tiempu y empleó cuasi 20 minutos pa mostrar el so refugu a la oficialidá.
Tamién esplicaron la so oposición a la reforma Ciudadanos y Foru, con portavoces que calificaron la propuesta de "comenenciosa" pa evidenciar les "contradicciones" de los socialistes "por intereses electorales". Tanto Nicanor García como Pedro Leal, respectivamente, apelaron al consensu necesario pa una reforma d'esti caláu y argumentaron que la defensa del asturianu pue facese col desarrollu efectivu de la Llei d'Usu y Promoción ensin necesidá d'incluyir la oficialidá nel Estatutu.
El portavoz socialista, Marcelino Marcos Líndez, señaló que la reforma planteada "nun ye oportuna" por facese a pocos meses del final de la llexislatura, apuntando tamién a "fines electoralistes". Pal diputáu socialista, el Gobiernu autonómicu dedicó recursos a avanzar na promoción y usu del asturianu. Asina, afirmó que nun existe contradicción sinón "respetu" ente grupu parllamentariu, el gobiernu y el partíu "sobre'l programa col que nos presentemos a les elecciones", dixo, añadiendo qu'hai tamién "respetu a les resoluciones congresuales".
Marcos Líndez, qu'aprovechó pa recordar lo qu'opinaben Francisco Álvarez-Cascos o Mercedes Fernández "hai 20 años" a favor de la oficialidá, díxo-y a la portavoz del PP que parez profesar "la fe del conversu" encamentando a los 'populares' a "respetar" a los que opinen distintu. "Nós respetamos anque nun compartamos el momentu procesal", añadió.
PODEMOS Y IX VAN SIGUIR "SUMANDO FUERCIES HASTA CONSIGUILO"
Per otru llau, Podemos y IX afirmaron que ye tiempu "de futuru pal asturianu" y aseguraron que, pese al refugu actual na Cámara, van siguir "sumando fuercies hasta consiguilo".
El diputáu de Podemos Andrés Fernández Vilanova defendió la iniciativa asegurando que se ta "faciendo historia" al existir una mayoría política p'atender a la demanda social, mesmo naquellos partíos nos qu'agora nun s'apoya parllamentariamente de forma "táctica", en referencia a la negativa del Grupu Socialista mentes la FSA-PSOE alcordó nun compromisu congresual la oficialidá.
Amás, el parllamentariu de Podemos incidió na defensa del gallego-asturianu, remarcando que "naide diz que l'asturianu sía un requisitu p'acceder a l'alministración". "Cuando se diz lo contrario ta tracamundiándose, igual que cuando se diz qu'hai detrás una intención nacionalista, como nun pasa en Galicia, onde'l so presidente, Alberto Núñez Feijóo (PP), "defende, apoya y fala el gallegu".
Fernández Vilanova criticó "postures necies" sobre la oficialidá según les "falacias" qu'empleen dende'l PP "como argumentos" dende "el mieu y el desconocimientu". "Valió d'escuses, ye tiempu d'allegría y de futuru pal asturianu", dixo.
Coles mesmes, la diputada d'IX Concha Masa llamentó'l fracasu de la comisión parllamentaria pa la reforma estatutaria na que s'apuntaba a la cooficialidá "como únicu camín válidu pa garantizar el so preservación y normalización". "L'únicu pasu que se dio atendiendo a los sos encamientos ye'l de güei a propuesta d'IX y Podemos", destacó, alvirtiendo de que dambes formaciones van siguir "sumando fuercies hasta consiguilo".
MERCEDES FERNÁNDEZ ASEGURA QUE RECIBE "AMENACES Y INSULTOS"
La portavoz de los 'populares' aprovechó la so intervención parllamentaria p'asegurar que recibe "amenaces y insultos" anónimos de los que se supón que defenden "una idea grande".
Mercedes Fernández calificó'l debate como "importante y interesante" por afectar "a la vida de los asturianos nes sos families y n'ámbitu llaboral". Nesti sentíu, apuntó que "un debate que camuda la sociedá asturiana" tien de cuntar "con un apoyu bien mayoritariu d'esa sociedá a la que diz representar".
"Nun se debe amansuñar en devanéu", dixo sobre l'Estatutu, criticando "una equidistancia estraña" de dalgunos p'añadir que "más importante que'l costu económicu ye'l costu de la llibertá".
La presidenta del PP asturianu resaltó que foi un gobiernu del so signu políticu'l que fixo la Llei d'Usu y Promoción, de la qu'enfeó a IX que nun fixera una defensa tan clara de la oficialidá cuando formaba parte d'executivos autonómicos. "Va haber demanda, pero nun ye mayoritaria de ningunísima manera", dixo.
