MADRID/UVIÉU, 18 Oct. (EUROPA PRESS) -
El ministru de Cultura y Deporte, José Guirao, y la conseyera de Cultura de la Generalitat catalana, Laura Borrás, "normalizaron" de cara a futuros presupuestos proyectos culturales que taben aparcaos, ente ellos retomar los documentos del Archivu Xeneral de la Guerra Civil, con sede en Salamanca --conocíos como los papeles de Salamanca'--.
Guirao esplicó que se va convocar en payares --entá ensin fecha definitiva-- una comisión de memoria histórica pa "resolver los temes pendientes" sobre esti asuntu "d'alcuerdu cola llei". "Y nun son tantos", ironizó Guirao --el gruesu de los 'papeles de Salamanca' yá foi treslladáu de Salamanca a Cataluña en 2006--.
"Nel cumplimientu de la llei tamos d'alcuerdu y nun va ser nada mui problemáticu de resolver. En dalgún momentu aparó por temes políticos, pero agora nun tien qu'habelos a dalgo que ta llexisláu", añadió'l ministru. Per otru llau, Borrás faló de "rematar un procesu y hai voluntá de facelo".
El treslláu a Cataluña d'una cantidá importante del Archivu de Salamanca xeneró polémica n'Asturies, porque miles de documentos d'orixe asturianu y prindaos poles tropes franquistes al cayer el Frente Norte pasaron de Salamanca al Arquivu Nacional de Cataluña, en San Cugat del Samartín de Vallés.
En Salamanca hai fondos documentales de particulares, instituciones y alministraciones prindaos n'Asturies poles tropes franquistes en 1937. Sicasí, nel 2006, treslladóse a Cataluña la documentación del Centru Asturiana de Barcelona, dirixíu pol históricu socialista asturianu José Barreiro nel momentu que la delegación na ciudá condal funcionaba como una embaxada de la Federación Socialista Asturiana.
Ente esos papeles tamién taría tola documentación xenerada polos asturianos exiliados en Barcelona y la relativa al Conseyu Soberanu d'Asturies y Llión, la institución política independiente de la República que gobernó la rexón en 1937.
Son unos documentos de vuelta difícil a Asturies pola integridá llegal del Archivu de Salamanca, que tien la finalidá d'axuntar y recuperar tolos fondos documentales sobre la Guerra Civil, y énte la sentencia del Tribunal Superior de Xusticia de Cataluña (TSJC) que refuga que la Generalitat devuelva los documentos pendientes de ser restituyíos a los sos propietarios.
Hasta'l momentu, lo máximo que se fixo dende Asturies ye que la Xunta Xeneral, por unanimidá, encamentó al Gobiernu autonómicu a realizar les actuaciones necesaries pa la devolución y depósitu en Salamanca de los documentos tresferíos a la Generalitat, "por formar parte integrante del archivu de titularidá estatal".
Actualmente, l'Arquivu Históricu d'Asturies dispón de 1.502 rollos de microfilme y tien inventariaos en soporte electrónicu toa esta documentación, lo que permite que, a falta d'orixinales, los documentos tean a disposición de los investigadores.
