UVIÉU/MADRID, 17 Dic. (EUROPA PRESS) -
L'exlíder d'Izquierda Unida (IU) y portavoz parllamentariu d'IX, Gaspar Llamazares, quexóse esti llunes de "purgues" y "amenaces d'espulsión" de los miembros de la dirección actual del partíu, "los mesmos", dixo, que trabayaron pa "eslleir" IU n'Unidos Podemos.
Al traviés d'una serie de comentarios na so cuenta personal de Twitter, que recueye Europa Press, Llamazares respondió asina al coordinador federal, Alberto Garzón, que-y avisó de que van estudiar midíes énte l'anunciu de presentar el partíu políticu Actúa a les elecciones europees, municipales y autonómiques, compitiendo con Izquierda Unida.
Garzón sorrayó que'l "transfuguismu" ye dalgo "bien grave", según los estatutos d'IU, que consideren infracción mui grave "dir en candidatures electorales, o realizar de forma pública campaña n'apoyu de les mesmes, "cuando éstes se presenten en competencia coles llegalizaes por IU o les sos organizaciones territoriales federaes".
Y, pa les infracciones mui graves, la penalización prevista nos estatutos ye "la suspensión de los derechos como afiliáu por un periodu dende un añu a dos años o la espulsión d'IU y el cese mentes el mandatu de los órganos de los que fuera miembru".
"L'ENEMIGU INTERNU COMO CORTINA DE FUMU"
Énte esto, Llamazares criticó que la dirección federal dedícase a amenacialu con "espulsiones" en vez d'analizar el resultáu electoral n'Andalucía "y responder al manifiestu qu'espresa'l malestar internu y la necesidá de rectificación de la política y les aliances". "L'enemigu internu como cortina de fumu --comentó nún de los sos 'tuits'--. Un clásicu".
Nesti puntu, el políticu asturianu carga contra Garzón y la dirección actual por "pidir agora cuentes preventivamente" a los que formaron Izquierda Abierta y agora Actúa cuando son "los mesmos que trabayaron pa la formación de Podemos y la disolución d'IU".
Coles mesmes, Llamazares esixe dientro y fuera d'IU "les garantíes mínimes del Estáu de Derechu". "Les purgues o espulsiones preventives, al marxe de los preceptos estatutarios, y los xuicios sumarísimos nun lo son", avisó.
